Hiệp hội Doanh nghiệp n’gor Dak Lak tâm rgop đah Hội Doanh nhân mom n’gor Dak Lak ƀư nkah gĭt 20 năm Nar Doanh nhân Việt Nam (13/10/2004-13/10/2024). Ta n’gor Dak Lak aƀaơ geh 13.100 doanh nghiệp dôl pah kan, hao rlău 700 doanh nghiệp nkôp đah năm 2023. Ăp doanh nghiệp ta Dak Lak dôl nsrôih rgâl mhe công nghệ, ntop hao năp rwăt ndơ mhe, dăp rgâl tay nkra njêng tăch rgâl tâm di đah nău ŭch ntŭk tăch.

Ta nar ƀư nkah git 20 năm nar Doanh nhân Việt Nam ndrel đah nău nkah gĭt tay nău way ơm tâm nkoch nău blău ơm mât uănh, ƀĭt joet, tăch rgâl, ăp doanh nghiệp geh âk nău ŭch n’hanh dăn đă mpeh trong ƀư, nău kơl gay pah kan săk rnglăy lơn. Wa Huỳnh Văn Dũng, Kruanh Hội doanh nghiệp Dak Lak an gĭt, ăp doanh nghiệp ta n’gor dôl dŭt ŭch ăp ntung nthoi Ngih dak gay hăn ntŭk tăch lam ntŭr neh.