Mbrơi mbrơi pĕ tĭng rkum cà phê dum an tâm sah, nô A Kham, ƀon Lê Toan, xă Ngọk Linh, nkuăl Đăk Glei, n’gor Kon Tum, dŭt rhơn yor năm aơ cà phê khlay âk. Yan aơ, rnăk wâl nô nchrăp geh bơi 80 rkeh prăk bah rlău 4.000 tơm cà phê, rnăk wâl nô A Kham lĕ rklaih luh ach o:

Gâp nti n’hanh ƀư tĭng cán bộ ntĭm, cà phê hun hao uĕh. 2 yan na nao hao khlay hôm, gâp dôl ƀư trong nchrăp năm taơ manh tay prăk ngân hàng gay pơk hvi rnoh neh cà phê. Rklaih luh ach o hôm yơn gâp nsrôih tay ƀư sa gay an oh kon hăn nti răp rjăp.

Nô A Min, Bí thư Chi bộ ƀon Lê Ngọk, xă Ngọk Linh, an gĭt, nău ntop kơl bah ăp gưl ủy đảng, n’gâng kan ƀon lan, tâm âk năm dăch aơ lĕ ƀư rgâl uĕh nău rêh n’hanh nkra njêng bah kônh wa. Rmôt pah kan bah n’gor, nkuăl n’hanh xă ndrel gŭ, ndrel sa, ndrel pah kan đah kônh wa, djôt ty ntĭm nău kan, ntĭm kỹ thuật tuch tăm, ntop kơl ntil tơm tăm, mpa rong. Tă bah nĕ, kơl kônh wa rgâl nău mĭn, trong ƀư, nsrôih lơn tâm pah kan jan sa. Rnoh neh cà phê, sâm rse, quế, đinh lăng, sâm ngọc Linh mô rlu hao, kơl hao nău geh an kônh wa, rnoh rnăk ach o hŭch ngăch. Knŭng tâm 4 năm, rnoh rnăk ach o tâm ƀon hŭch bơi 60%, aƀaơ knŭng hôm 20 rnăk ach o. Wa A Min mĭn lah, kônh wa dôl ntơm geh ndơ gay đăp mpăn pah kan jan sa.

Bah năp đaơ wăng sa jêr jŏt đŏng yơn aƀaơ dơh hôm, kônh wa rgâl tĭng njoat hôm. Âk rnăk dơi Đảng, Ngih dak uănh tât geh jay gŭ kơt aơ dŭt đăp mpăn. Kônh wa uănh khlay hun hao wăng sa, rnăk ri way tăm sâm, rnăk ri manh ƀư sa êng dŭt âk lah cà phê, quế, bời lời, sâm rse. Êng sâm Ngọc Linh ri ăp rnăk tâm thôn ăp rnăk tăm da dê. Rnăk geh ndơ ri tăm âk, rnăk jêr jŏt tăm đêt.

Tĭng wa A Thảo, Bí thư Đảng ủy xă Ngọk Linh, bah năp đaơ ƀon lan ach o ngăn n’gor yor mô gĭt trong tuch tăm, mô geh prăk ntuh kơl. Năm 2020 let bah năp, kônh wa klach manh prăk yor mô gĭt manh gay moh ndơ ƀư. Rgâl ngăn ngên đah xă, rnôk N’gor ủy Kon Tum, Nkuăl ủy Đắk Glei lăp, ndâk ƀư bôk nău rgop an tâm nchră kơl xă hun hao wăng sa, rêh jêng. Nuĭh ƀon lan dơi ntĭm tuch tăm tâm di đah nău geh đah neh ntu, trôk nar, ƀư geh ăp ndơ tâm di nău ŭch ntŭk tăch. Ăp trong tâm rgop nkra njêng tĭng rmôt kan ndrel, kan ndrel đah ăp ntŭk tăch, doanh nghiệp rwăt lĕ geh. Knơm nĕ, rnoh rnăk ach o lam xă hŭch ngăch, bah rlău 70% aƀaơ knŭng hôm 21%. Wa A Thảo nsing nơm: knŭng đêt năm tay xă Ngọk Linh mbra ntơm jŭt n’hŭch ach o.

Xă Ngọk Linh bah năp lah xă ach o, ach o ngăn n’gor, lam dak. Knơm hăn di trong lah hun hao tơm dak si, joi ndơ geh âk, kônh wa geh nău tâm rgop an jêng ndơ luh đăp mpăn. Ma hun hao sâm Ngọc Linh lah ntơm rgâl mhe an kônh wa rklaih ach o. Gâp nsing nơm rgŏ năp kônh wa mbra hun hao.

N’gor ủy Kon Tum jao nău kan an nkuăl Đắk Glei du năm hŭch 10% rnăk ach o. Bí thư Nkuăl ủy Đăk Glei, wa Thái Văn Tưởng an lah, aơ lah rnoh ndơ ƀư mô dơh, ngăn lah đah 2 xă Mường Hoong n’hanh Ngọk Linh, gŭ ngai nkuăl tât 70km, trong hăn jêr jŏt, 99% rnoh nuĭh lah nuĭh rnoi mpôl đêt. Yơn đah nău nsrôih, dŭt n’hâm bah lĕ trong chính trị đah trong hăn di, nău n’hŭch ach o ta 2 xă lĕ rlău rnoh an ƀư n’gor jao.

Knơm geh nău rđău, ƀĭt joet bah Ban Thường vụ N’gor ủy, Ban Thường vụ Nkuăl ủy n’hanh nău lăp bah gưl ủy ƀon lan, tât aƀaơ nău mĭn, trong ƀư bah kônh wa, nău rêh wăng sa, rêh jêng bah nuĭh ƀon lan 2 xă Mường Hoong n’hanh Ngọk Linh geh rgâl na nê̆. Tâm rnôk dŭt năm 2020, rnoh rnăk ach o 2 xă aơ lah rlău 70% ri tât aƀaơ rnoh rnăk ach o hôm rlău 21% dơm.

Wa Thái Văn Tưởng mĭn lah, xă ach o mhe knŭng lah bôk năp, nkuăl Đắk Glei lĕ nchrŏng trong gay 2 xă Mường Hoong, Ngọk Linh jêng du nkual thôn ƀon ndrŏng. Nkuăl dôl ntrôl boăt nthoi đah nkual ƀon têh kơt Nkual ƀon têh Hồ Chí Minhg, Hà Nội, Đà Nẵng... n’hanh ăp doanh nghiệp nsing nơưm tâm dak gay ndâk ƀư ntŭk aơ jêng du ntŭk pâl nđaih uănh nsong, ƀư ngăn.