Ta Hà Nội, Ban Nội chính Trung ương ƀư Tâm nchră pơk sŏng dăng tât ăp bôk ƀoh lam dak n’glôch jêh pah kan n’gâng kan Nội chính Đảng n’hanh nău kan bah Ban Rđău đă njrăng n’gang sa khâm, mpŭng lir, tih djơh gưl n’gor năm 2024, trong rƀŏng nău dơn kan năm 2025.

Lah rđău đă ta rnôk tâm nchră, Tổng Bí thư Tô Lâm -Kruanh Ban rđău đă Trung ương mpeh njrăng, n’gang sa khâm, mpŭng lir, tih djơh uănh năl tâm năm 2024 pah kan njrăng, n’gang sa khâm, mpŭng lir, tih djơh tâm lam n’gâng kan Nội chính Đảng n’hanh bah ăp Ban rđău đă gưl n’gor nkual ƀon têh dơi mât tay di quy định, di trong rƀŏng đah nuih n’hâm mô geh nkual mpăng mô geh mha êng bol nê lah moh nuĭh, rgop rdâk nâp tay nău nsing nơm bah nuĭh ƀon lan đah Đảng, dơi băl mpôl dak bah dih rnê âk. Tâm ban ŭch đah ăp nău dơn kan ma lam N’gâng kan n’gluh tâm năm 2025, Tổng Bí thư dăn đă, nkra bah dĭl ăp nău nchiăng khan mpăn đêt hŏ dơi nchŏng kloh tâm siƀŭt mbơh n’hanh ăp nkô̆ nău ta tâm nchră. Lah rjăp năm tât mbra ƀư âk nar kan têh khlay bah neh dak, Đảng n’hanh Ngih dak he geh dŭt âk trong nchrăp đah nău mĭn mhe, nău ndơ̆ luh dŭt âk. Jêng, lam n’gâng kan nội chính Đảng n’hanh ăp Ban rđău đă gưl n’gor nkual ƀon têh ân grêt dăch, rƀah gĭt gay nsŏng kơl geh nău tam đah Đảng n’hanh Ngih dak tâm pah kan nội chính.