N’gor Gia Lai dôl tĭng ƀư ăp njuat rgâl mhe dăng tâm dăp rgum nuĭh kan tĭng nuih n’hâm Nghị quyết mbrô 18 bah Ban Chấp hành Trung ương Đảng khóa XII, gay glêh tam bôk kan n’hanh n’hao nău dơi yach ngăch nău kan.

Ntơm bah năm 2021 tât aƀaơ, n’gor hŏ hŭch 2 chi cục, 23 jrô kan chuyên môn mpeh sở, 20 jrô kan mpeh ăp chi cục, n’hanh 2 jrô kan chuyên môn bah ăp mpôl kan êng ƀa ƀă; lôch jêh uănh an dŏng ntŭk gŭ pah kan an lĕ rngôch ăp n’gâng kan tâm n’gor; rdâk njêng đề án n’glăp Sở Ngoại vụ tâm Văn phòng UBND n’gor, hao rblang dăn gưl geh nău dơi kan uănh an. Tâm lvang năm 2022–2024, n’gor hŏ rtŭt glêh tam 351 nuĭh, rgop ƀư an glêh tam rmôt cán bộ, công chức. Nkre, Ban Cán sự Đảng UBND n’gor hŏ rđău đă ôp ŭanh tay lam lĕ rngôch, mbơh gưl geh nău dơi kan gay dăp rgum tay nuĭh kan, n’glăp, dơn ngoăy du đêt n’gâng kan tĭng trong nchrăp bah Chính phủ. Tâm let năp tay, n’gor Gia Lai nchrăp hŭch tay 6 sở, n’gâng kan; 21 jrô kan mpeh sở n’hanh 30 jrô kan mpeh ăp chi cục; rtŭt glêh n’gâng kan nhih pah kan ngih dak hôm 104 nhih pah kan.