Bâh năm 2022 tât aƀaơ, nkuăl ƀon têh Pleiku lĕ geh pơk 5 jrô nti jut nău mô gĭt rplay săm ƀŭt an nuĭh ƀon lan rnoi đê̆ đah bơi tât 100 nuĭh nti ta ăp xã Biển Hồ, Chư Á, Gào n’hanh phường Chi Lăng. Ntoh lư kơt jrô nti jut nău mô gĭt rplay săm ƀŭt ta ngih nti Tiểu học Lê Lai xã Chư Á, geh rlău 30 nuĭh ƀon lan ta Bông Phun n’hanh Mơ Nú. jrô nti lĕ geh ƀư ƀa ƀơ bâh nar ngoăy tât nar prăm ăp pơh, aƀaơ lĕ bơi lôch. Nchrăp ăp nuĭh nti mbra geh dơn săm ƀŭt kơp dơn lôch nti ta bôk năm 2025. Yuh H Then, 30 năm deh, ƀon Mơ Nú, xã Chư Á tât râng jrô nti rhơn nkoch.

 "Ntơm nơh ê hŏ gĭt rplay săm ƀŭt hăn bah dih ji bêk ngăn, mô nă nănh yor lah mô gĭt rplay săm ƀŭt jêng dŭt jêr ăp nău kan. Hăn nti gĭt rplăy săm ƀŭt, gĭt răk gĭt nchih mô hôm geh nău bêk nhĕ rnôk hăn bah dih tâm mâp tâm ngơi đah bu”.

Wa Nguyễn Đình Thức, kruanh ntŭk kan ntĭm nti nkuăl ƀon têh Pleiku, n’gor Gia Lai, an gĭt, ăp jrô nti nău mô gĭt rplay săm ƀŭt lĕ kơl an ăp nuĭh gĭt răk gĭt nchih, gĭt kơp n’hanh geh gĭt ăp nău khlăy êng mpeh nău rêh jêng gay ma dŏng kơt tâm nău rêh pah kan ăp nar.

 “Phòng giáo dục lĕ geh ƀư ăp mpôl kan hăn uănh nđôi ta ăp ntŭk ngih nti mpeh nău geh dơi ntĭm nti ăp môn Toán, Tiếng Việt geh ăp nău kơp, djăt ăp nuĭh nti răk, năi nti răk an kon hoc nchih, lôch nĕ nuĭh nti geh mbơh nău mĭn nơm bâh ntơm ê hŏ nti n’hanh lĕ lôch hăn nti mhâm geh nău rgâl. Bâh nău uănh năl nsum rĭ ăp nuĭh nti geh nău dơi tĭng nău ŭch, tâm di đah nău ŭch nău rŏng bâh khân păng rĭ lah dŭt rhơn, gĭt răk, gĭt nchih gay ma bâh nĕ geh nău dơh nơih mât kơl an nău rêh ƀon lan”.

Đah nkual n’har bri kơt nkuăl Đức Cơ, Gia Lai, lvang năm 2022-2025, nkuăl mhe geh pơk tay 20 jrô nti an nuĭh mô gĭt rplay săm ƀŭt đah rlău 600 nuĭh nti. Ta ăp jrô nti ta nkual n’har bri, ăp nai nti lĕ rlet rlău âk nău jêr gay ma kơl an ăp nuĭh nti. Wa Lê Phú Huy, groi kruanh ntŭk kan ntĭm nti nkuăl Đức Cơ an gĭt.

 “Bâh ăp jrô nti an ăp nuĭh mô gĭt rplay săm ƀŭt lĕ geh nsĭt tay săk rnglăy, âk nău kan ueh gay ma n’hao rnoh nuĭh mô gĭt rplay săm ƀŭt tâm năm deh bâh 15 tât 60 gay ma nta nău dơh nkhêp an nuĭh ƀon lan ta nkual ƀon lan rnoi đê̆ geh n’hao nău gĭt vât. Ntŭk kan lĕ ntĭm đă nai nti rgâl mhe trong kan ntĭm nti an tâm di đah nuĭh âk năm deh. Ntŭk kan lĕ ƀư jrô nti ndơ dŏng an tâm di đah nău pah kan nău rêh tâm ban kơt hun hao wăng sa rêh jêng bâh ƀon lan, ndrel đah nău kan bâh cán bộ mât uănh, nai nti tâm nău kan rgŏ jă nuĭh nti hăn nti bâh ăp thôn ƀon”.

Ngăn lah, nău kan ntĭm nti an nuĭh mô gĭt rplay săm ƀŭt hôm nha geh nău tât râng bâh tahen n’har bri Gia Lai. Ta ntŭk ƀon lan gŭ ta thôn Suối Khôn, xã Ia Mơ, nkuăl Chư Prông, ntŭk geh 70 nuĭh mô gĭt rplay săm ƀŭt, pôih tahen n’har bri Ia Lôp lĕ geh ƀư 2 jrô nti bâh n’gul năm 2023 tât aƀaơ. Đại úy Nguyễn Văn Luân, kruanh rmôt rgŏ jă ƀon lan, pôih tahen n’har bri Ia Lôp an gĭt.

 “Rnôk geh ƀư jrô nti geh âk mê̆ bơ̆ geh kon hăn nti ndrel đah mê̆ bơ̆ đŏng. Gay ma đăp mpăn jrô nti n’hanh dơi geh săk rnglăy âk rĭ hên geh pă ăp nkual pâl rlưn gay ma ăp oh kon se tât pâl rlưn, mpeh ta trôm rĭ mê̆ bơ̆ ăp oh mon mbra nti an ueh”.

Tĭng nău mbơh bâh ntŭk kan ntĭm n’hanh nti n’gor Gia Lai, lam n’gor aƀaơ geh klâp ma 60 rbăn nuĭh mô gĭt rplay săm ƀŭt tâm năm deh bâh 15-60 năm deh, geh tât 5,6% rnoh nuĭh, dŭt âk lah bu ur rnoi đê̆. Rđil đah lam dak, Gia Lai geh rnoh nuĭh mô gĭt rplay săm ƀŭt dŭt âk. Ƀư tĭng bôk nău kan nkô̆ mpong ngih dak hun hao wăng sa rêh jêng nkual ƀon lan rnoi đê̆ n’hanh gôl yôk lvang năm 2021-2025, Gia Lai lĕ geh pơk 735 jrô nti an nuĭh mô gĭt rplay sƀ tâm 23,5 rbăn nuĭh. Wa Lê Duy Định, Giám đốc ntŭk kan ntĭm n’hanh nti n’gor Gia Lai mbơh, aƀaơ lam n’gor geh 15/17 ntŭk kan gâl nkuăl geh jut n’huch rnoh mô gĭt rplay sƀ rnoh 2, geh dơi đah nkô̆ mpŏng lvang 1 mpeh mbơh nti an nuĭh mô gĭt rplay săm ƀŭt tĭng bôk nău kan rdâk njêng ntŭk rêh jêng lvang năm 2021-2030 bâh n’gor.

“Bâh nău kan mbơh tơih jut nău mô gĭt rplay săm ƀŭt an ƀon lan rnoi đê̆ bâh năm deh 15 năm let lơ, ta nău ngăn bôk nău kan lĕ geh nsĭt tay âk nău dơi geh an ƀon lan. Tâm let năp tay ntŭk kan ntĭm n’hanh nti n’gor mbra geh ntĭm đă tay ăp ntŭk kan ntĭm n’hanh nti ta ăp ntŭk ƀư tĭng bôk nău kan jut jăng nău mô gĭt rplay săm ƀŭt an geh ƀư ueh dơh lơn gay ma nta nău nơih an ƀon lan geh hăn nti tŏng ăp n’hanh lĕ rngôch”.

Đah nău nsrôih bâh ăp gâl kan n’gâng kan, nai nti, nău kơl an bâh mpôl tahen n’har bri, n’gor Gia Lai dôl nsrôih ƀư tĭng geh nău dơi nău kan jut jăng nău mô gĭt rplay săm ƀŭt, ntop n’hao nău dơi nău rêh, nău way bâh nuĭh ƀon lan, hun hao wăng sa rêh jêng, ngăn lah tâm nkual ƀon lan rnoi đê̆.