Wa Ngô Hiểu Khoa, Giám đốc rnâng kan leo kan Tập đoàn Đèo Cả an gĭt trong ntu trôm neh Phượng Hoàng jong 1,7km, lah du rnoh tâm nău dơn ƀư kan geh lĕ rnoh jong 11km yor ntŭk kan dơn ƀư. Aƀaơ ăp nar tập đoàn pă geh bơi tât 400 nuĭh kan n’hanh klâp ma 100 ndeh klư máy mok, tâm ndrih ƀư rdâk njêng trong trôm neh Phượng Hoàng ndrel đah 10 mblâm ntung. Lah nău kan ntrơn ntŭk gŭ an ƀon lan mpeh đah n’gor Khánh Hòa geh ƀư ơm, rĭ mbra mbluh trong trôm neh ta dŭt năm 2025 lah ƀư lôch. Trong têh Khành Hòa - Buôn Ma Thuột geh lĕ rnoh jong rlău 117km, geh 4 mbor ndeh hăn, mông nar ƀư rdâk njêng lvang 1 bâh năm 2021-2025. Lĕ rnoh ntuh kơl ƀư bơi tât 22 rbăn rmen prăk. Aƀaơ lĕ nuĭh tơm dơn ntuh kơl n’hanh ntŭk dơn ƀư lĕ geh rgum lĕ rnoh kan mbơh tơih ƀư nău kan, nkô mpŏng tât dŭt năm 2026 lam lĕ rngôch trong mbra an lăp dŏng.