Năm nti mhe 2026 – 2027, Ngih sam ƀŭt Phổ thông nội trú Tiểu học n'hanh Trung học cơ sở Ia R'vê geh 34 jrô đah 880 kon hŏk, tâm nĕ 216 kon hŏk gŭ ta ngih sam ƀŭt. Wa Hồ Sĩ Cát, Hiệu trưởng ngih sam ƀŭt an gĭt, ndrel đah nchrăp ăp ndơ rhŏ dŏng an ntĭm n'hanh nti, ngih sam ƀŭt uănh khlay ngăn tât trong kan njrăng n'gang srê an kon hŏk.  "Mpôl hên tâm rgop đah Ngih dak si xă Ia R'vê, Ngih dak si Đoàn Kinh tế - Quốc phòng 737 ƀư puh dak si, nkhĭt măch, tăp măch ta ntŭk ntô wăr jrô nti, nkual ký túc xá, jay sông sa bán trú, nội trú. Ntrôl dăng kon hŏk mât kloh uĕh ntŭk gŭ rêh nkual ntŭk gŭ nsum. Nkre, đă jrô dak si ngih sam ƀŭt nchrăp tŏng ăp dak si gay nking n'gang nău kon hŏk mâp nău tât."

 Oh Đậu Anh Thư, 10 năm deh, ta xã Ia Rvê rơh bôk năp ngai rnăk wâl nti n'hanh gŭ rêh ta ký túc xá. Jêh du pơh ƀư bên đah ntŭk gŭ mhe, Anh Thư lĕ mbrơi mbrơi ntơm bên đah nău rêh nchrăp êng:  "Lor rnôk sa ri oh ân rao ty, ƀư tĭng sa sĭn, ngêt duh. Rnôk pâl ri mô pâl ta ăp ntŭk nđik, geh âk măch yor păng mbra kăp ăp oh, jêng ân njrăng. Mpôl hên kŏ tâm pă mông gay rƀŭn nchră đŏng. Rnôk bĭch ri nsoh bok gay der bah măch kăp."

Lam n'gor Dak Lak aƀaơ geh 650.000 kon hŏk tĭng nti ta 625 ntŭk ntĭm nti. Wa Lưu Tiến Quang, Groi Giám đốc Sở Giáo dục n'hanh Đào tạo n'gor Dak Lak, an gĭt, nău njrăng, n'gang srê ta ngih sam ƀŭt dơi n’gâng kan ta n’gor uănh năl lah nău kan khlay.  "N'gâng kan ntĭm nti lĕ ntĭm rđău ăp ntŭk ntĭm nti, ngih sam ƀŭt, ngăn lah ta nkual jru, nkual ngai, nsrôih ƀư mpôih kuaih kloh uĕh ntŭk ntô gŭ âm, ntĭm nti gay njrăng, n'gang duh rtoh trong mham. Rlău ma nĕ, đah ăp nău ji tâm tưp êng tĭng yan, đă rmôt kan dak si ntĭm nti kon hŏk an tĭng groi nđôi na nê̆ gay n'hŭch đêt ngăn nău ntưp rêng nuh srê ntoh luh, ntưp rêng tâm ngih sam ƀŭt."

Nai dak si Hoàng Hải Phúc, Giám đốc Ntŭk uănh nđôi kop ji n'gor Dak Lak, an gĭt năm nti mhe lah rnôk âk ngăn yan mih, ƀư ăp nău ji tâm ntưp kơt duh rtoh trong rse mham, jâng ty mbung, ji ndŭl djroh… hao âk. N'gâng kan dak si tâm rgop đah n'gâng kan ntĭm nti dôl mbơh ƀư ăp trong nchrăp lor njrăng, n'gang nuh srê: "Ăp nkuăl ntrŭnh ƀư ăp nau kan răk kloh ntŭk ntu, răk kloh ngih vâl gay ma njrăng, rdâng ăp nau ji rtoh trong mham, ji jâng ty mbung, rtoh luh dak; nkre n'hao nau chuh ntop, chuh n'gang ân ăp kon se ê geh chuh dak si tŏng ăp. Tâm ăp ngih săm ƀŭt ndrel ăp nkuăl mra geh nau khuch âk, phung hên đă cán bộ jur mêt uănh, uănh năl nau geh rnoh véc-tơ, rnoh măch ndrel lah saơ nau khuch âk ri ân ndeh ô tô leo máy puh dak si nkhĭt măch, nkhĭt bu bi tăp măch tâm âk ntŭk."./. "

Tuấn Long/VOV Tây Nguyên