Năm aơ, Dak Lak geh rlău 21.100 kon hŏk dăn râng tâm rlong, tâm nĕ geh rlău 610 kon hŏk râng êng. N’gor Dak Lak tâm pă tay 32 ntŭk tâm rlong na nê̆ đah 886 jrô tâm rlong ta 15 nkuăl, nkual têh n’hanh nkual ƀon têh. Tât rnôk aơ, UBND n’gor Dak Lak lĕ ndâk ƀư Ban ntĭm rđău gưl n’gor n’hanh ntĭm rđău ăp ntŭk ndâk ƀư Ban ntĭm rđău gưl nkuăl, nkual ƀon têh; lôch jêh ăp sam ƀŭt sam tra tâm măy, uănh nđôi, nkra di nu nău bah ăp kon hŏk tĭng di nar ntrŭnh; nchrăp ăp ndoh ndơ, nuĭh kan râng ƀư tâm rlong... Wa H’Yim Kđoh-Groi Kruanh UBND n’gor Dak Lak, Kruanh Ban ntĭm rđău tâm rlong gưl n’gor đă, ăp gưl, ăp nău kan, ƀon lan an n’hao trong kan tâm rgop, nchrăp lor ndâk njêng trong ƀư tâm rlong na nê̆, ngăn ngên, đăp mpăn rơh tâm rlong ƀư đăp mpăn, săk rnglăy, rhăt jăp, di trong ƀư. Uănh mĭn lơn tât trong kan nu nău nkoch trêng mpeh rơh tâm rlong.

“Mbơh pă tŏng ăp ngăch, nu nău di na nê̆ ăp nău ntrŭnh nu nău mbơh khlay geh tât rơh tâm rlong. Lơn lah, dŭt n’hâm uănh tât đah ăp ngih sam ƀŭt jru ngai, nkual jêr jŏt gĭt đah ăp nău mbơh geh trong nchrăp ntop kơl gay ăp oh geh tŏng ăp nău mbơh ngăch nchrăp nuih n’hâm uĕh ngăn an rơh tâm rlong”.

Năm nti 2022-2023 ta Dak lak lĕ ntơm lôch. Aơ lah rnôk ăp kon hŏk jrô 9 săch trong hăn tay an nơm. Tâm rlong lăp jrô 10 ăp ngih sam ƀŭt chuyên, ndơ̆ sam ƀŭt rhăch nău săch tĭng gưl mô lah săch nti nău kan lah nău dŭt dơi uănh tât. Nău kan ntĭm nti Dak Lak dôl nsrôih an trong kan săch lăp jrô 10 n’hanh tâm pă ntŭk kon hŏk jêh trung học cơ sở.

Ngih sam ƀŭt Chuyên Nguyễn Du, nkual ƀon têh Buôn Ma Thuột lah ngoăy tâm âk ngih sam ƀŭt dơi âk kon hŏk săch gay dăng râng tâm rlong lăp bôk năp. Tĭng trong nchrăp, năm nti 2023-2024, ngih sam ƀŭt mbra săch 405 kon hŏk jrô 10, geh 9 jrô chuyên n’hanh 2 jrô mô chuyên. Nar dơn sam ƀŭt rhăch nău bah 25 tât 31/5. Wa Nguyễn Đăng Bồng-Hiệu trưởng Ngih sam ƀŭt THPT chuyên Nguyễn Du, n’gor Dak Lak an gĭt:

“Kon hŏk an rlet rlău 2 rơh, rơh 1 uănh nđôi sam ƀŭt rhăch nău, ăp oh an tâm di 2 nkô̆ nău: 1 lah nti n’hanh hạnh kiểm 4 năm nti geh bah loại khá let lơ n’hanh tal 2 lah tốt nghiệp trung học cơ sở bah ăp oh an bah loại khá let lơ. Rnôk ăp oh tŏng 2 nău aơ hôm ri ăp oh mbra lăp rơh 2 gay râng tâm rlong 4 môn: Toán, Ngữ Văn, Ngoại ngữ n’hanh 1 môn chuyên”.

Tĭng trong ƀư săch jrô 10 năm 2023-2024 bah n’gor Dak Lak, ndrel đah ngih sam ƀŭt THPT chuyên Nguyễn Du ri ăp ngih sam ƀŭt THPT Dân tộc nội trú N’Trang Lơng n’hanh Ngih sam ƀŭt THPT Dan tộc nội trú Đam San mbra kơt tĭng trong ƀư săch. Ăp ngih sam ƀŭt THPT công lập êng kơt tĭng trong săch. Hôm đah ăp ngih sam ƀŭt THPT, ngih sam ƀŭt phổ thông geh âk gưl nti tư thục, săch êng tĭng nkô̆ nău trong nchrăp săch bah UBND n’gor.

Đah ăp oh jêh tốt nghiệp trung học cơ sở mô tŏng dơi an uănh săch lăp ăp ngih sam ƀŭt THPT ri hôm e geh âk trong săch rnôk ăp ntŭk ntĭm nti nău kan ta n’gor dơi tâm di nău ŭch nkre nti nău kan ntop đah nti văn hóa. Wa Đỗ Tường Hiệp, Groi Giám đốc N’gâng kan ntĭm nti Dak Lak an gĭt: Rnoh tâm pă ntŭk kon hok jêh tốt nghiệp THCS ta Dak Lak lah dŭt âk, geh 80% dĭng lĕ rnoh kon hŏk jrô 9.

“Đah ăp kon hŏk mô dơi tŏng ăp an kon hok tâm ăp ngih sam ƀŭt THPT, ăp ntŭk ntĭm nti nău kan, ntĭm nti thường xuyên ri nchrŏng trong ntĭm nău kan an ăp oh mbra râng nti ta ăp ngih sam ƀŭt nti nău kan, ngih sam ƀŭt trung cấp, cao đẳng n’hanh ăp trong hăn. Yor nê trong kan ntĭm nău kan tâm ngih sam ƀŭt dơi ntrôl dăng gay ntĭm an ăp oh lăp tâm nău rêh n’hanh nti, mô an knŭng geh ngih sam ƀŭt THPT ma đah ăp trong êng dơi nti uĕh n’hanh geh nău rêh ta rgŏ năp”.

Tâm âk năm bah năp, ăp ngih sam ƀŭt trung học n’hanh Ntŭk ntĭm nti nău kan-ntĭm nti thường xuyên ta Dak Lak tâm rgop rjăp tâm nău ƀư ntĭm nău kan an kon hŏk. Du năm geh nklăp 3.000 nuĭh nti bôk nău ntĭm nti thường xuyên, bah 30.000 tât 35.000 nuĭh nti dơi ntĭm nău kan, nti nău kan phổ thông tâm di đah soan, nău ŭch bah săk nơm n’hanh nău ŭch bah ntŭk pah kan. Ntrong kan ntĭm nti văn hóa tâm rgop đah ntĭm nti nău kan ta ăp ngih GDNN-GDTX dơi ƀư, rgop uĕh an trong kan tâm pă kon hŏk jêh THCS tĭng bôk nău rgop an tâm nchră “Ntĭm nti nchrŏng nău kan n’hanh nchrŏng trong tâm pă kon hŏk tâm ntĭm nti phổ thông lvang 2018-2025”.