Yan wai ta nkual n’har bri nkuăl Cư Jut n’gor Dak Nông duh r’ôl. Tâm tiểu khu 833, nkual neh Dak Wil, xă Dak Wil, gưl ndŏk nja lĕ kro, tơm pih kro ranh da dê, ƀư geh ŭnh sa hao rnoh mbơh njrăng gưl 4. Nô Phạm Văn Nhị, nuĭh kan Trạm kiểm lâm mrô 1, Công ty Lâm nghiệp Dak Wil an gĭt 6 nuĭh kan trạm an nchrăp kâp rdâng, ƀư ăp nău kan njrăng n’gang ŭnh sa bri.

Mpôl hên nchoeng rwang nkual jêh nĕ su tĭng nkual, knŭng su tâm nkual nchoeng rwang gay uănh nđôi ŭnh. Mpeh trong n’gar nking n’gang ŭnh, oh nô ntơm muih n’găih, rgum kloh, ƀư an ƀah bah 5-7 mét, gay lah geh ŭnh sa, rnoh rêng mbra mô dơi geh. Đah ăp njok trong nuĭh ƀon lan way luh lăp, mpôl hên nglăp tôl mô an dŏng ŭnh n’hanh nkoch trêng an nuĭh ƀon lan mô lăp su ŭnh rêng hvi.

Công ty Lâm nghiệp Dak Wil dôl mât uănh bơi 29.000ha bri, tâm nĕ 100ha bri tăm, hôm ƀa ƀă lah bri hon êng, gŭ n’gul 2 n’gor Dak Nông, Dak Lak n’hanh kâng n’har Campuchia. Wa Nguyễn Hồng Việt, Groi Giám đốc công ty, nkoch trôk nar ta nkual n’har bri duh lơn ăp nkual êng bah 7-10 độ C, ƀư geh ŭnh sa bri âk lơn. Yor nê, trong kan njrăng n’gang ŭnh sa bri dơi ntŭk kan mbơh ƀư ơm lơn:

Tât bôk yan wai, công ty ăp nar lĕ hăn uănh, saơ geh nkual dơh ŭnh sa mbra nchoeng n’gang, pă oh nô su mkra dâl. Lĕ rngôch geh 11 ntŭk mât njrăng bri, du ntŭk geh 2 bồn dak ntêm nkrem đah nklăp 4.000 lít/bồn n’hanh du bồn dak dŏng nklăp 5.000 lít, rnôk geh nău ŭnh sa mbra dŏng ndeh rdêng tât gay puh nsĕt ŭnh. Rlău ma nĕ, ăp ntŭk dơi pă an bình puh nsĕt ŭnh tŏng ăp.

N’gor Dak Nông aƀaơ hôm e nklăp 249.000 ha bri, tâm nĕ rlău 196.300 ha bri hon êng, rgum âk ta ăp nkuăl Dak Glong, Dak Mil, Dak Song, Cư Jut n’hanh Tuy Đức. Tĭng wa Trần Văn Linh, Groi Chi cục trưởng Chi cục Kiểm lâm Dak Nông, năm 2024, lam n’gor geh 30 rơh ŭnh sa bri, ƀư khuch nklăp 32 ha, hao ndal nkôp đah ăp năm bah năp. Gay n’hŭch rnoh ŭnh sa bri, Chi cục lĕ rhoăt nău blău ơm, ndâk ƀư ơm ăp trong gay n’hao trong kan mât uănh, njrăng n’gang ŭnh sa bri. Wa Trần Văn Linh an gĭt:

Chi cục Kiểm lâm n’gor lĕ tâm ôp tâm nchră N’gâng kan Tuch tăm mât rong n’hanh Hun hao ƀon lan, UBND n’gor Dak Nông ntĭm rđău ăp ban mât uănh bri krŏng, bri njrăng n’gang phŭt sial; UBND ăp nkuăl, nkual ƀon têh n’hao trong kan uănh nđôi, groi uănh ăp ntŭk khlay geh ŭnh sa bri gay uănh nđôi njrăng n’gang ŭnh sa. Rlău ma nĕ, Chi cục lĕ ntĭm rđău ăp Hạt Kiểm lâm, ăp nuĭh tơm bri n’hao uănh nđôi, groi uănh trong kan njrăng n’gang bri yan wai; tâm rgop đah ăp ban mât uănh bri, kơt ăp công ty lâm nghiệp ƀư tĭng trong kan kâp njrăng, uănh nđôi, hăn uănh, mât njrăng n’hanh njrăng n’gang ŭnh sa bri tâm rnôk yan wai duh phang năm 2025.