Ntơm rlau n’gul khay ma aơ, wa A Kiêu, tâm thôn Kon Long, xã Đăk Tơ Lung, nkuăl Kon Rẫy, n’gor Kon Tum rhơn ngăn. Tâm tâm ngih dôl ma nkra bơi jêh, wa nkoch: gŭ tâm ngih geh 6 nŭih n’ăp bu ranh ndrel kon se, ngih lĕ truh sat ngăn ri ma mih truh mô geh ntŭk gay ma bĭch. Geh Bí thư Chi bộ A Tẻ bonh đă, lĕ ngih wa A Kiêu ntop tay nau rnơm rlet nau rvê “nơm mô geh ndơ” gay ndâk ngih mhe:

‘Bah năp nơh rnăk hên gŭ ndeh dơm, ngih truh, lah geh mih ri mbĕ mô geh ntŭk ma bĭch ơm. Rnôk aơ gâp geh ngih dak kơl an 60 rkeh gay ma ndâk ngih mhe, Jêh ri kônh wa hăn kơl sŏk lŭ, choi sĭt ndâk nkra ngih. Geh ngih hôm hôm ân n’ăp ma xi măng, ƀư nau kan kơl dơm dam mô geh sŏk prăk. Ngih mhe bơi jêh hôm ma yan mih năm aơ ri ma ăp rnăk nơm ri đăp mpăn ngan’.

Ƀư tĭng nau kan tâm rlong nsum ty jut ngih truh sat, Chi bộ thôn Kon Long năl lah geh 2 rnăk ân geh kơl ƀư ngih mhe, geh rnăk wa A Kiêu ndrel yuh Y Seng. Ntơm nau hăn lor kơl an 2 rnăk ƀư ngih bah 9 đảng viên tâm chi bộ, 96 rnăk tâm ƀon ƀư kơt tĭng. Bí thư Chi bộ A Tẻ, mbơh, rnơm geh nsum ty, rgop n’hâm bah ƀon lan đah nau “moh ndơ geh kơl ndơ nê”, ăp ngih geh ngih dak kơl an 60 rkeh yơn nau ngăn lah rnoh ngih geh ndâk tât ma rhiăng rkeh đŏng. Ngih bah 2 rnăk jêr ngăn tâm ƀon kŏ geh nâp nâl đŏng:

‘Kônh wa gơih ngăn nau kơl an ân ăp rnăk jêr jŏt. Kơl an tâm ban ngăn, kơl doh rưih ngih, kuih neh ngih. Ăp rmôt kan tâm thôn bonh đă kônh wa kơl an prăk du rnăk rgop 5 rbăn. Kônh wa rdeng choih, lŭ, kơl njur gạch. Kônh wa gơih ngăn ƀư kan”.

N’gor Kon Tum geh 2.752 ngih, tâm nê nau ŭch ndâk mhe 2.200 ngih ndrel ƀư nâp rlau 560 ngih. Bah năp rnoh prăk bah n’gor mô tŏng, âk rnăk tâm nkuăl jru, ngai đôl rdeng, rgum ndơ...Rnâng kan rđau jut ngih truh sat ăp gưl bah n’gor Kon Tum n’hao nau leo trong bah ăp nŭih đảng viên ndrel ăp gưl uỷ ntŭk kan tâm dâng tâm nau kơl an ndâk nkra, ƀư nâp ngih. Wa Nguyễn Văn Thuỷ, Groi Kruanh UBND nkuăl Kon Rẫy mbơh, mô êng kơl an kônh wa đah nau bonh đă, kơl an nau ndâk nkra, ăp Bí thư Chi bộ ndrel đảng viên tâm nkuăl hôm kuăl jă nau tâm rgop kơl an, rgum ăp tơm kan gay ma dơi geh kơl ăp ngih geh ndâk, ƀư ân nâp nâl tay, đah rnoh prăk geh âk lơn rnoh geh bu kơl:

‘Đah nau rđau đă bah nkuăl uỷ, Rnâng kan nkuăl uỷ nau kan jut ngih truh sat, geh nau dơi an tâm ban nuih n’hâm râng bah ăp cán bộ, đảng viên jêh ri ƀon lan ndrel nsum mpôl ƀon lan tâm dâng. Cán bộ, đảng viên tât kơl an âk’.

Nau ngăn ân saơ, rlau 440 nŭih Bí thư Chi bộ nkre Thôn ƀon, Kruanh Tổ dân phố ndrel ma âk rbăn nŭih đảng viên bah n’gor Kon Tum hŏ geh nau rgop ngăn, săk tam tâm nau nsôih jut ngih truh sat ân ƀon lan. Tât lôch khay 3 n’gor Kon Tum bư jêh nau ndâk mhe, nkra nâp 1.776 ngih. Wa Nguyễn Khắc Thời, Bí thư Chi bộ nkre Kruanh thôn Kon Jri Xút, xã Đăk Bla, nkuăl ƀon têh Kon Tum nkoch:

‘Chi bộ geh 9 đảng viên lah đảng viên nŭih tâm ntŭk. Đảng viên lah nŭih leo trong kơl an ân nŭih ach o jut ngih truh sat. Mông mbah cờ bôk pơh, ăp khay chi bộ vay nkoch trêng ma ƀon lan rgop n’hâm soan kơl an jut lơi ngih truh sat”.

Wa Nguyễn Duy Lơ, Bí thư Chi bộ nkre Kruanh thôn Đăk Tang, xã Rơh Kơi, nkuăl Sa Thầy, mbơh:

‘Đah nau kan lah du Bí thư Chi bộ-Kruanh thôn hên bonh đă ƀon lan tâm thôn ndrel druh ndăm tât kơl an kônh wa moh ndơ geh ri kơl ndơ nê, geh n’hâm kơl n’hâm, geh drăp kơl drăp. Tâm rgop ma prăk bah gưl kan ba kơl kơl an ân rnăk vâl ndâk ngih ân geh nâp lơn, ueh lơn gay kônh wa đăp mpăn pah kan jan sa tâm ăp yan mih tât’.

Nau kan tâm rlong “Nsum ty jut ngih truh sat tâm lam dak tâm năm 2025’ yor n’gor Kon Tum ntrŭnh ƀư, mô êng nsrŭng tâm nau rgâl nau geh ueh bah ngih vâl ma hôm lah du gưl khlay tâm nau ndâk njêng ndrel ƀư nâp nau rnơm bah ƀon lan đah Đảng. Ăp nau kan n’hêl, ngăn bah ăp Bí thư Chi bộ ndrel đảng viên tâm Kon Tum hŏ ntoh kloh nau dơi leo trong, nau kan bah đảng viên tâm nau mât chăm nau rêh ân ăp rnăk hôm mâp nau jêr. N’gor Kon Tum nsôih tât lôch khay 6 năm 2025 mra ƀư jêh nau ndâk mhe, nkra nâp ngih trih sat, kơl an ăp rnăk ƀon lan mâp nau jêr tâm n’gor geh nau rêh ueh lơn ndrel đăp mpăn bah năp yan mih phŭt sial tât./.