Đăp mpăn nău dơi dah rŏng chroh  rƀŭn tâm rnoi mpôl đê̆ lah trong kan sŏng rnŏng bah Đảng, Ngih dak Việt Nam. Ntơm bah rnôk Luật tín ngưỡng, tôn giáo geh nău tam tâm năm 2018, pah kan mât uănh ngih dak mpeh chroh rƀŭn dôl dơi an ƀư năn ngăch nkra nău ŭch geh tâm  di bah ăp mpôl, ăp nuĭh ƀon lan. Đah trong rƀŏng “rêh uĕh, chroh uĕh”, ăp kon chroh n’hanh n’gâng kan ta ntŭk hŏ n’hanh dôl nsrôih ndrel đah n’gâng kan rdâk njêng tâm rnglăp lam rnoi nuĭh, hun hao wăng sa rêh jêng kon nuĭh n’hanh đăp mpăn rnă njrăng ta ntŭk.

Tâm bah ri aơ nơh, Linh mục Hoàng Văn Số, chính xứ giáo xứ Thanh Hà, xã Ia Đrăng, nkuâl Chư Prông, n’gor Gia Lai hŏ ntik n’hao uĕh nău khlay kan lah ntung njŏ đah ăp mpôl kan chính trị rêh jêng kon nuĭh đah ƀon lan kon chroh ta ntŭk. Tĭng păng, gay ăp trong ntĭt leo uĕh , nău kan geh nkô̆ khlay dơi rêng lam ri ân geh nău dơn kan nsĭt nău dơi tam.

Yor kơt nê̆, tâm  ăp mông ntĭm rêng giáo lý, linh mục giáo xứ Thanh Hà way ndop đah ăp nkô̆ mpeh nău nsing nơm, nuih n’hâm tâm rnglăp, tâm kơl nsum tâm nău rêh, mât đăp mpăn rnă njrăng, rdâk njêng rnăk wâl rhơn răm. Lơn lah mât nti kon său nău uĕh leh di, rƀŏng an rơh mom ndăm tât nău rêh uĕh chroh uĕh.

Đah giáo xứ lơn lah tâm  nuih n’hâm du  hê kon chroh bap, mpôl hên tĭng ƀư lĕ rngôch ăp ntil nău dŭt uĕh lăng an kônh wa, mbơh nti gŭ rêh, pâl rlưn, mô lah  an ăp kon său kơt nti, way dơi ntrŭt nsôr. N’hanh nău nê ân mô dơn lah nău tâm rlong tâm giáo xứ, ma rnôk hăn tât nhih nti, rlău ma nău rêh ri ân gay ma hun hao kon nuĭh mpeh lĕ rngôch ăp ntil đŏng.

Đah trong rƀŏng lah an ƀon lan, djăt, ƀư an ƀon lan  kơt tĭng, ntĭm  gung leo trong an ƀon lan hăn n’hanh ntĭt leo lor an ƀon lan saơ”, Đảng ủy, n’gâng kan Mặt trận Tổ quốc ăp gưl n’hanh ăp mpôl kan hŏ kan nsum đah ăp kruanh chroh rƀŭn, nuĭh geh nsing nơm ntoh lư tâm ƀon lan an ƀư âk trong ntĭt leo nsĭt geh nău tam ngăn ngăn kơt: nkual chroh mô geh nuĭh tih djơh, mât njrăng ntŭk gŭ rêh, mât săk tơm văn hóa rnoi nuĭh, rdâk njêng ƀon lan mhe nar lơn ma nsĭt geh nău dơi n’hanh nău kan geh tâng jru.

Đah trong ƀư lah kônh wa ƀon lan kon chroh dơi ntăm an nău dơi mât njrăng êng n’hanh nău dơi n’glêh êng lah nău khlay tơm. Ntơm bah nê ntik dơi nuih n’hâm n’hanh suan dăng bah ƀon lan geh chroh. Ăp nuĭh ntĭt leo lor ntoh lư tâm trong leo ƀư tâm rlong rŏng dak ntoh nar lơn ma âk tâm nkual ƀon lan rnoi mpôl đê̆ kon chroh ta n’gor Gia Lai.

Ntĭt kơt bu ranh ƀon Siu Vớt ta giáo xứ Ia Đreng, nkuâl Chư Pưh. Ntĭk n’hao nău khlay kan bah nuĭh đảng viên, du kon chroh rŏng dak, ăp nău ntĭm nti bah wa Hồ mpeh tâm rnglăp đah nuĭh gŭ neh ntu n’hanh chroh rƀŭn, ryơk brah, rŏng dak way dơi păng nkah mbro gay pah kan lĕ n’hâm suan.

Bu ranh lah ân lah ăp ntil nău mô hŏ uĕh di. Ndrănh djăr, nhŭl bêh khêh dong djơh ngăn. Đảng viên he lah tâm ban kơt nê đŏng. Ntơm bah geh Đảng mơ geh trong, geh điện, nhih dak si, nhih nti, aƀaơ hŏ geh lĕ. He lah geh ngăn ri nuĭh ƀon lan mơ djăt he.

I ngăn pah kan rgŏ jă, đăp mpăn nău dơi dah rŏng chroh rƀŭn ta nkual ƀon lan rnoi mpôl đê̆ geh chroh ta n’gor Gia Lai an saơ đŏng, gưl ủy n’gâng kan ta ntŭk Mặt trận n’hanh ăp nsum mpôl hŏ ntik uĕh nău khlay kan, nău dơn kan pah kan rgŏ jă nsing tâm kruanh chroh rƀŭn gay nkoch trêng, rgŏ jă ƀon lan geh chroh tĭng jăp n’hanh tĭng ƀư gung trong, trong nchrăp, trong kơl Đảng, Ngih dak, rgop  tâm  nău hun hao nsum bah n’gor,

Mô lah kơt n’gor Sóc Trăng lah ntŭk geh âk ƀon lan rnoi Khơ me gŭ rêh, lôch rnôk Luật tín ngưỡng, tôn giáo dơi n’gluh an dŏng n’hanh geh nău tam, Ban Tôn giáo Chính phủ nsrôih, kan nsum  đah ăp Bộ, ăp n’gâng kan, ăp n’gor geh  tât tâm nău tĭng ƀư ăp rơh rgŏ jă, nkoch trêng ƀon lan Khơ me tĭng ƀư ăp trong nchrăp bah Đảng, trong kơl  pháp luật bah Ngih dak mpeh chroh rƀŭn ma âk trong ƀư. Âk chùa Khơ me hŏ dơi năp ăp tŏng tủ siƀŭt pháp luật rhŏ dŏng sư sãi n’hanh  ăp kon chroh Phật tử Khơ me. Ta du đêt ntŭk bah n’gor Sóc Trăng ntŭk geh âk mpưm ƀon lan Khơ me gŭ rêh, gưl ủy n’gâng kan hŏ uănh khlay ntĭm nti, ntop kơl  n’hanh kan nsum đah Hội tâm rnglăp sư sãi rŏng dak tâm nău nkra ăp nău ŭch geh ntŭk gŭ chroh rƀŭn tâm di bah ƀon lan rnoi nuĭh Khơ me, nsĭt tay nău rhơn nđơr, nsing nơm an ăp kon chroh. Wa Danh Cụng Long, uỷ viên Ban trị sự phật giáo Việt Nam n’gor Sóc Trăng an gĭt:

Ngih dak dŭt uănh khlay tâm nkô̆ nău lah ăp sư ŭch hăn tu dak bah dih nta trong dơh an ƀư siƀŭt hăn nti ta dak bah dih đŏng n’hanh bah meng nê lah n’gor Sóc Trăng geh nhih nti trung cấp Pali Nam Bộ, lah ntĭm nti an ăp sư dôl tu nti. Ndrel bah meng nê, lah Ngih dak nta trong dơh n’hanh tâm kơl nsum ntĭm nti ăp chùa ma ŭch n’glăp kinh sách, ndơ dŏng kan chroh rƀŭn. Ăp năm, Đảng, Ngih dak n’hanh Sở Văn hoá, Thông tin n’hanh Pâl nđaih ƀư lễ da dê, nchreng an uănh ndơ nsoh bah nuĭh rnoi mpôl đê̆. Bah meng nê đŏng, ngih dak uănh khlay tât ăp lễ hội têh bah n’gor, thị xã, phường, ấp tât rhơn nsum n’hanh rhơn tết trụ trì ăp chùa đŏng.

Aƀaơ, dôl geh rlău 100 chư tăng Phật giáo Nam Tông Khmer ta Sóc Trăng lah êng n’hanh nkual đồng bằng sông Cửu Long lah nsum dôl hăn nti ăp thạc sỹ, tiến sỹ way n’gâng kan Luật học ta ăp dak kơt Thái Lan, Campuchia, Myanmar, Sri Lanka, Ấn Độ…v…v. Đah nău mât uănh khlay bah n’gâng kan ta ntŭk, lĕ rngôch ăp chùa Khmer ta Sóc Trăng rdâk njêng dơu ăp ntŭk rgum nti rplay siƀŭt, ntĭm nti nău kan an ƀon lan. Bah meng nhih nti, 92 chùa Khơ me ta Sóc Trăng aƀaơ way pơk ăp jrô ntĭm nti rplay siƀŭt Khmer đŏng.

Tĭng Thượng tọa Trần Văn Tha, Groi kruanh Ban Trị Sự Giáo Hội Phật giáo n’gor Sóc Trăng, nău ntĭm nti rplay siƀŭt Khơ me ta ăp chùa Phật giáo Nam Tông hŏ jêng  nău way ơm kơl ăp rơh mom ndăm gĭt nchih, gĭt rŏ rplay siƀŭt bah rnoi nuĭh he nơm, rgop mât ndray nău ngơi, chữ nchih, ăp văn hóa tĭng nău way uĕh lăng bah ƀon lan Khơ me.

Chùa lah du ntŭk rgum kan gay ntĭm nti mpeh văn hóa, ntĭm nti mpeh rplay siƀŭt, ntĭm nti mpeh nuih n’hâm uĕh lŏng, jêng nuĭh, n’hanh hôm ntĭm nti nău kan an phật tử đŏng. Đah ăp kon se tâm rnôk khay rlu nti dja, chùa geh pơk jrô ntĭm nti văn hóa, nău ngơi Khơ me an ăp kon se ntơm bah jrô 1 tât jrô 5 đŏng. Đah ăp nuĭh gŭ lunh hăn tât chùa, bah meng nti nău ngơi Khơ me hôm nti nău Pali, nti giáo lý, nti ăp nău way ơm bah rnoi nuĭh he đŏng.

He mbra dơi lah, ăp n’gor geh âk ƀon lan rnoi mpôl đê̆ hŏ n’hanh dôl nsrôih tĭng ƀư ăp kôp ăp trong nkra gay đăp mpăn nău dơi dah rŏng tĭng chroh rƀŭn. Ăp mpôl chroh, tâm rnglăp, geh nău tâm ban tĭng trong “rêh rhơn mƀak uĕh lăng, ndrel hăn rnoi nuĭh”. Nơm geh kơt nê̆ nău chroh rƀŭn dah rŏng gŭ tâm trôm pháp luật bah Ngih dak, rgop đăp mpăn chính trị, đăp mpăn lam rêh jêng kon nuĭh n’hanh hun hao wăng sa rêh jêng kon nuĭh ta ntŭk.

Nău đăp mpăn dah rŏng chroh rƀŭn mô dơn mpơl nău uănh khlay bah Đảng, Ngih dak đah nău rêh nuih n’hâm bah ƀon lan, ma ntơm bah nê rgop mât njrăng nău dơi kon nuĭh, mât njrăng ăp nău ŭch geh tâm di mpeh chroh rƀŭn bah ƀon lan rnoi mpôl đê̆ lam dak./.

VOV4