Tâm rnôk gŭ hăn pah kan đah Hoa Kỳ râng rơh hop tâl 69 bah Ủy ban ntŭk gŭ kan têh khlay bu ur bah Hội đồng wăng sa- rêh jêng kon nuĭh Liên hợp quốc, Groi Kruanh Quốc hội Nguyễn Thị Thanh mhe geh rơh pah kan đah Thượng nghị sỹ Marsha Blackburn n’hanh Thượng nghị sỹ Peter Welch.

Ta ăp rơh mâp, Groi kruanh Quốc hội Nguyễn Thị Thanh lah rjăp Việt Nam way tâm ban ŭch an ƀư gung trong tâm boh dak bah dih êng nơm, nsrôih ndôr êng, âk ding, âk trong, lah băl, lah nuĭh tâm boh nsing nơm n’hanh dak lăp kan nsrôih nsum nsrôih uĕh, geh nău dơn kan bah nsum mpôl lam ntŭr neh; nkre lah rjăp Việt Nam way uănh Hoa Kỳ lah dak tâm boh khlay têh jong n’hanh ŭch rŏng ndrel Hoa Kỳ tĭng ƀư tay ngăn ngăn n’hanh an ƀư tâm boh têh jong lam lĕ rngôch tĭng trong rƀŏng nar lơn ma tâng jru, ngăn ngăn, geh nău dơi tam. Thượng nghị sỹ Marsha Blackburn  n’hanh Thượng nghị sỹ Peter Welch nkoch ăp nău uănh năl bah Groi kruanh Quốc hội mpeh ăp nău dơi bah tâm boh bar ding tâm 30 năm aơ, lah rjăp Hoa Kỳ êng uănh khlay tâm boh đah Việt Nam n’hanh nău bar dak n’hao jêng tâm boh têh jong lam lĕ rngôch năm 2023 an saơ Việt Nam hŏ jêng dak tâm boh dâk bôk năp bah Hoa Kỳ ta nkual.