Ôi 14/3, ta Ntŭk Rgâl mhe mĭn ƀư mhe Ngih dak Hà Nội, Thủ tướng Phạm Minh Chính râng Rƀŭn nchră nău kơl “Việt Nam nchrăp lor hun hao nău kan Công nghiệp bán dẫn n’hanh Trí tuệ nhân tạo tâm rach năm mhe”. Rƀŭn nchrăp rgum tât râng rlău 1.000 đại biểu lah ăp nuĭh kruanh, nuĭh way kan công nghệ prêh tât bah âk tập đoàn têh ta lam ntŭr neh, ndrel âk doanh nghiệp tât bah ăp dak Hoa Kỳ, Trung Quốc, Hàn Quốc, Nhật Bản, Ấn Độ, Pháp, Đức, Hà Lan... n’hanh Việt Nam gay tâm nchră ăp trong nchrŏng hun hao, dơi geh n’hanh ntŭl rlong bah nău kan công nghiệp bán dẫn n’hanh trí tuệ nhân tạo (AI) lam ntŭr neh, dăn đă trong nchrŏng hun hao ăp ntil nău công nghệ aơ an Việt Nam.

Tă bah Rƀŭn aơ, Việt Nam rƀŏng tât jâng nsan mhe ta lam ntŭr, pơk luh ăp dơi kan ndrel têh hvi, nta an nâp nâl an rnôk rgâl mrô, gĭt n’hanh ƀư tơm công nghệ, ƀư tĭng nău rƀŏng hun hao ngăch n’hanh nâp nâl tâm lvang tât. Aơ lah trong hăn khlay gay ăp nuĭh khoa học, kan ndrel dak bah dih n’hanh tâm rgop, kan ndrel đah Việt Nam jêng rach năm mhe an jâng wăng sa mrô bah Việt Nam.