Ăp nar aơ, kônh wa xă Ba Vinh, ngoăy tâm 5 xă tâm nkual đăp mpăn nkuăl Ba Tơ, n’gor Quảng Ngãi dôl nsrôih sreh keo lai. Aơ lah ngoăy tâm âk tơm tăm kơl kônh wa nuĭh H’Re ta Ba Tơ rklaih ach o. Bah nkual neh ach o jêr jŏt, tât aƀaơ, ƀon lan lĕ gĭt tăm ba lŏ, tăm keo lai, mât rong sŏk đêt nar mât jong nar jêng nău rêh mbrơi rgâl. Wa Phạm Văn Nhít, ta xă ba Vinh, nkual Ba Tơ an gĭt:

Thôn mpôl hên geh dŭt âk, rnăk âk ri 20-30 ha, rnăk đêt ri 2-3 ha. Mô geh roh yan an 5 năm, du ha geh rhiăng tấn. Prăk tăch geh ri an ƀư jay, rwăt ndeh, an kon hăn nti.

Ntŭk Đăp mpăn nkual Ba Tơ, n’gor Quảng Ngãi gŭ ta trong Quốc lộ 24 n’gŭr răm nthoi đah Tây Nguyên bri krŏng yôk prêh. Ăp trong hăn uĕh, dơi ntuh kơl ndâk ƀư ăp nău nchrăp ƀư nkual ƀon têh Ba Tơ lah nău khlay ntuh kơl an ntŭk Đăp mpăn nkual, đah prăk hăng rhiăng rmen prăk. Nĕ lah ăp trong Trần Quý Hai, 30/10, Trần Toại. Ƀư tĭng ăp bôk nău kan 30a, 135. Ăp năm bah năp, nkuăl Ba Tơ, n’gor Quảng Ngãi rgum ntuh kơl ndâk ƀư ntung trong kỹ thuật, nău rêh jêng; mbơh ƀư ăp nău nchrăp, ntrong ƀư nkra njêng hun hao wăng sa rêh jêng. Ăp ntŭk gŭ tâm nkual Đăp mpăn lĕ geh âk nău rgâl, 100% rnoh xă tâm nkuăl geh trong ndeh ô tô tât nklang xă, 100% xă geh ngih dak si, ngih sam ƀŭt... Tât aƀaơ, rĭng geh bôk nuĭh geh rlău 8,7 rkeh prăk/năm, nkra njêng lŏ mir rgâl tĭng trong săk rnglăy n’hanh uĕh kah âk.

Lơn lah, nău kơt dŏng ăp trong khoa học n’hanh công nghệ an tuch tăm tao ta neh nkô, yôk gay n’hŭch dak rchoh, dak rdu neh dŭt săk rnglăy. Nkuăl ủy Ba Tơ lĕ an Nghị quyết mĭn an rgum mât chăm, njrăng n’gang bri geh aƀaơ, ntrôl dăng tăm bri gay ƀư ndrŏng, n’hao trong kan mât rong, uănh njrăng n’hanh sŏk uĕh ndơ geh bah bri, đăp mpăn ntŭk ntô gŭ âm nâp nâl.

Nkuăl Ba Tơ mĭn nchrăp, tăm bri sŏk si lah ngoăy tâm âk ndơ gay hun hao wăng sa nâp nâl n’hanh jŭt n’hŭch ach o, rgop mô jêt tâm nău mât njrăng ntŭk ntô gŭ âm bri dak. Rĭng du năm, lĕ nkuăl tăm bơi 6.600 ha bri keo sŏk si, tât aƀaơ rnoh neh bri nkra njêng ta nkuăl geh bơi 66.000ha, n’hao uĕh jêng bah bri ta rlău 66% dĭng lĕ rnoh neh. Knơm tăm keo sŏk si, âk rnăk ta Ba Tơ lĕ hao rklaih ach o, geh nău rêh sâm ndrŏng. Wa Trần Duy Thảo, 72 năm deh ta xă Ba Động, ngoăy tâm 4 xă hun hao ngăn ta nkual Đăp mpăn Ba Tơ nkoch:

 Rgâl ngăn lah ntung trong, ndâk ƀư dŭt kloh uĕh, trong hăn hăn, ngih sam ƀŭt ngih dak dŭt kloh aih. Bah năp đaơ geh du đêt xă mô geh trong hăn tât tâm xă ma aƀaơ geh trong chay da dê. Hôm ngih dak si, đăp mpăn đŏng, uĕh blău y nai dak si tâm di nău ŭch. Đah nkuăl Ba Tơ, lĕ rngôch lah nuĭh rnoi mpôl đêt aƀaơ hun hao ngăch, nsrôih bah tĭng rnăk.

Nkuăl yôk Ba Tơ, n’gor Quảng Ngãi geh bơi 84% nuĭh rnoi mpôl H’re, Nkual neh aơ lah ntŭk geh ntŭk tâm lơh tâm su Ba Tơ kăl e lơ 11/3/1945, ntŭk deh Rmôt du kích Ba Tơ rnôk ntơm rdâk lơh.

Wa Đinh Ngọc Vỹ, Bí thư Nkuăl ủy Ba Tơ, nuĭh rnoi mpôl H’re mĭn rvê đah hun hao ƀon tơm. Jêh bơi du rơh ƀư tĭng Nghị quyết Đại hội Đảng bộ nkual rơh tal 14, lơn lah năm 2024, Ba Tơ lĕ geh đah âk săk rnglăy uĕh. Tĭng lĕ khlay nkra njêng ŭch geh rlău 2.300 rmen prăk, geh rlău 100% trong nchrăp, hao 9,96% nkôp đah rơh aơ năm 2023. Nău geh rĭng bôk nuĭh geh 50,7 rkeh prăk/du hê/năm, hao 4 rkeh prăk nkôp đah năm 2023. Đảng bộ nkuăl Ba Tơ uănh khlay trong kan jŭt n’hŭch ach o. Lah kơt năm 2021, nkuăl geh bơi 6.000 rnăk ach o ri tât dŭt năm 2024 hŭch hôm 2.800 rnăk, geh 15,95%... Wa Đinh Ngọc Vỹ an gĭt, tât aƀaơ, lĕ rngôch ăp xă nkual Đăp mpăn lĕ ƀư jêh jŭt ngih rông mpông sat an rnăk ach o, rnăk dơi kơl. Nkuăl nsrôih dŭt năm aơ, ndơ̆ rnoh rnăk ach o jŭr hôm 4,74%.

Ba Tơ lĕ rgum âk prăk an hun hao ăp xă nkual Đăp mpăn, ngăn lah ntuh kơl ntung trong, ngih sam ƀŭt, ngih dak si gay đăp mpăn nuĭh ƀon lan nkual Đăp mpăn uĕh lơn; Dŏng ăp tơm prăk, ăp prăk tâm rgop gay ƀư hun hao wăng sa rêh jêng nkual Đăp mpăn. Aƀaơ, geh 1 xă nkual Đăp mpăn tât lor thôn ƀon mhe năm 2019. Ăp xă ƀa ƀă geh nău rgâl âk tâm hun hao wăng sa rêh jêng, n’hŭch ach o nâp nâl n’hanh rgâl uĕh nău rêh nuĭh ƀon lan kơt xă Ba Dinh, Ba Vinh n’hanh Ba Thành. Năm tât nsrôih tay ăp xă tât lor thôn ƀon mhe lvang 2026-2030, n’hŭch rnoh rnăk ach o, êp ach o, n’hao rnoh nău rêh bah nuĭh ƀon lan.