Lơ 13/3, ta Ngih Chính Phủ, Thủ tướng Chính phủ Phạm Minh Chính lĕ wơt Đại sư Hoa Kỳ ta Việt Nam Marc E. Knapper gay tâm nchră mpeh ăp ntil nău kơl lor ntrôl kan ndrel ăp ding. Thủ tướng Chính phủ mĭn lah Việt Nam uănh Hoa Kỳ lah kan ndrel khlay têh; mĭn lah nău mbơh na nao bah Tổng Bí thư Tô Lâm n’hanh kruanh gưl prêh Việt Nam dŭt uănh khlay n’hanh  ŭch kan ndrel rjăp đah N’gâng kan Tổng thống Trump gay ntrôl tâm boh kan ndrel têh hvi lĕ rngôch.

Thủ tướng Chính phủ lah rjăp an ndơ̆ tay kan ndrel wăng sa-tăch rgâl-ntuh kơl lah nău uĕh ang n’hanh nuih n’hâm tâm boh ăp ding. Chính phủ Việt Nam uănh tât nta an mro ăp nău kan bah doanh nghiệp, nuĭh ntuh kơl Hoa Kỳ ta Việt Nam, mĭn lah Việt Nam ŭch ndâk njêng tâm boh kan ndrel wăng sa-tăch rgâl-ntuh kơl tâm ban, đăp mpăn, n’hanh nâp nâl đah Hoa Kỳ, yor nău geh nsum bah 2 dak.