Ôi 18/3, ta Jay Quốc hội, Ủy ban Thường vụ Quốc hội ƀư tay hop rơh 2 Rơh hop 55 (khay 3/2026). Bôk nău kan rơh 2 bah Rơh hop ƀư tâm 1 nar n’gul, Ủy ban Thường vụ Quốc hội mbra an nău rgop mpeh âk trong nchrăp Luật khlay, tâm nê geh trong nchrăp Luật Hộ tịch (rgâl nkra), trong nchrăp Luật Thủ đô (rgâl nkra).

 Tĭng bôk nău kan, bah ôi, Ủy ban Thường vụ Quốc hội an nău rgop mpeh trong nchrăp Luật rgâl nkra, kơi ntop du đêt nkô̆ bah Luật Tâm rlong, nkhôm rnê; An nău rgop mpeh trong nchrăp Luật rgâl nkra, kơi ntop du đêt nkô̆ bah Luật Nhih pah kan ntơh măt dak Cộng hòa xã hội chủ nghĩa Việt Nam ta dak bah dih. Ủy ban Thường vụ Quốc hội mbra mĭn uănh, ŭch an nău dăn đă bah Thủ tướng Chính phủ mpeh nău ntăm n’hao Đại sứ đặc mệnh toàn quyền dak Cộng hòa xã hội chủ nghĩa Việt Nam ta dak bah dih. Nkre, mĭn uănh, n’gluh an dŏng Nghị quyết bah Ủy ban Thường vụ Quốc hội n’gluh an dŏng nău way tâm dâl nău bah Quốc hội.

Kêng măng, Ủy ban Thường vụ Quốc hội mĭn uănh, n’gluh an dŏng Nghị quyết rgâl nkra, kơi ntop Nghị quyết mbrô 1744 nar 27/6/2025 bah Ủy ban Thường vụ Quốc hội mpeh Săk Ủy viên Hội đồng sơch, groi nđôi Thẩm phán gưl neh dak; An nău rgop đah siƀŭt hao rblang dăn bah Chánh án Nhih phat dôih ƀon lan gưl têh hao dăn Quốc hội ŭch an nău dăn đă ntăm n’hao Thẩm phán Nhih phat dôih ƀon lan gưl têh.