Di nkah, nar ndâk rmôt nŭih pah kan lŏ mir Việt Nam, măng 14/10, ta Hà Nội hŏ geh nar rnê nkhôm nŭih pah kan lŏ mir Việt Nam ntoh lư, rnê rmôt tâm boh nau kan ntoh lư tâm lam dak năm 2024. Ntoh nau tâm nar rƀŭn, Kruanh Quốc hội Trần Thanh Mẫn rnê prêh, kơp dơn, rnê nau nsôih ndrel ăp nau tă geh dơi bah rmôt kan lŏ mir Việt Nam, bah ăp nŭih cán bộ, nŭih ƀon lan kan lŏ mir, ntŭk tâm boh nau kan tuch tăm bah lam dak, ngăn lah 63 nŭih, 63 ntŭk tâm boh kan nsum ntoh lư geh rnê tâm nar rƀŭn.

Đah ăp nŭih, rmôt kan ntoh lư geh rnê, Kruanh Quốc hội đă, ân geh lŏ hăn leo lor tâm nau tâm boh, ƀư nau kan tuch tăm tăch rgâl; lŏ nsôih n’hâm, nau mĭn, ntĭm mbơh nau blau, kơl an âk nŭih êng, gay geh tay âk ƀon lan hao ƀư sâm geh ngăn, âk ntŭk tâm boh ƀư nau kan tuch tăm geh nau dơi, gay ndrel ma ƀon lan ƀư nkô̆ nau hun hao nâp nâl, ndâk njêng ƀon lan mhe./.