Đah rnoh neh 70m2 geh 2 jrâu bĭch, du jrâu ân năch gŭ ndrel ma ngih ŭnh, ngih ăch, ngih mhe ndâk nâp kơl an rnăk wa Nay Hdoănh, tâm thôn Mơ Nai Trang, xã Ia Piar, nkuăl Phú Thiện ƀư dơi nau ŭch geh ngih. Nar rep ngih nâp, wa rhơn nkoch: bah năp nơh, rnăk wa rêh tâm ngih truh sat, mih ri truh, nar ri duh. Rnôk aơ geh ngih nâp, rnăk wa mô kâp rvê tât ntŭk gŭ ôh, ma ôm nsôih pah kan, răk rong kon sau hăn nti. Nau rhơn bah rnăk wa Nay Hdoănh kŏ lah nau rhơn bah 355 rnăk êng geh jut ngih truh sat tâm nkuăl Phú Thiện:

            ‘Geh Đảng, Ngih dak kơl an ndâk ngih mhe kơt aơ, gâp rhơn ngăn. Mô mĭn lah nơm lŏ geh ngih ueh kơt aơ ôh. Lah ueh ăp gưl rđau kan, lah ueh bôk nau kan hŏ kơl an rnăk vâl hên geh ngih ueh lơn”.

            Ndrel ma nkuăl Phú Thiện, Chư Prông, nkuăl geh rlau 1000 ngih truh sat ân geh rgâl-kŏ dôl nsôih ƀư jêh nau kan. Năl aơ lah nau kan khlay, leo tât nau kơl an ueh, Rnâng kan rđau jut ngih truh sat bah nkuăl pă ân ăp nŭih mêt uănh, bonh đă. Wa Đinh Văn Dũng-Bí thư nkuăl uỷ, Kruanh HĐND nkuăl Chư Prông, kruanh rdâng kan rđau kan nkual mbơh, nkual rgum lĕ nau dăng dơi, rgum ngăn gay doh rklaih nau jêr, ƀư ân săk tam. Ndrel ma nê, nkuăl hŏ rgum tơm prăk, pă 54 rmen gay ƀư kan. Ăp xã ntrŭt dăng nau nkoch trêng, bonh đă ƀon lan rgum nŭih kơl tâm rnăk vâl, ƀon lan, tâm rgop ân tahen tâm nkuăl gay ndrel râng ndâk ƀư. Tât rnôk aơ, rnoh ngih geh ndâk ndrel ma jêh hŏ rlau 70%. Đảng bộ nkuăl dôl ƀư ngăch, nsôih jêh lĕ 997 ngih bah năp lơ 30/6/2025, đăp mpăn 100% rnăk ach o, êp ach o geh ngih:

            ‘Tâm ăp nar ri hên rgum bonh đă ndâk ntơm 8-10 ngih. Ăp khay, ăp rơh, Rnâng kan bah nkual kơp uănh tay nau kan bonh đă, nkre rgum nau kơl an bah ăp gưl, đor lor nar kan. Rnôk aơ lam nkuăl geh 75% nar kan bah ăp rnăk đor lor, hôm e lah hên bonh đă nau rgop kơl an bah ăp rmôt ndrel tahen tâm nkual gay kơl an nar kan. Ndrel ma nê, n’hao nau mêt uănh gay đăp mpăn ntŭk ƀư kan ân nâp’.

            Rnôk aơ, n’gor Gia Lai ƀư jêh 93% nau nchrăp jut lơi ngih truh sat. Tâm rnoh 17 nkual, nkuăl têh, nkuăl ƀon têh ri geh 10 nkuăl ƀư jêh nau kan, ăp nkuăl êng geh ntơm 70-19% nau nchrăp. Nau aơ ân saơ nau rđau kan năn, tâm di bah ăp gưl uỷ Đảng, nau lăp an bah lam ntrong kan chính trị ndrel nau rgop nsum n’hâm bah lam ƀon lan.

            Nau ƀư jut ngih truh sat tâm Gia Lai lah nau mpơl saơ kloh nau rđau kan mro ndrel nsôih chính trị prêh bah ăp gưl uỷ đảng. Ntơm n’gor tât xã, pă nau kan, mông nar kan, mât nau dơi ƀư jêh nau geh jao ăp khay ndrel mbơh nau kan ăp pơh hŏ njêng nau tâm rlong rjăp. Ăp ntŭk kan Đảng ƀư nau kan tơm, leo trong bonh đă, rgum nau dơi tâm ƀon lan. Nuih n’hâm tâm kol ‘n’ha ueh nkŭm n’ha sat” ndrel nau kan “Ntă nŭih geh n’hâm kơl n’hâm, geh ndơ kơl ndơ” hŏ rêng lam. Âk nau kan kơt Công an n’gor, Binh đoàn 15, rmôt tahen Biên phòng ndrel ăp rmôt tahen tâm nkuăl nsum ty, rgop n’gâm ndrel n’gâng kan ndrel ƀon lan ƀư ân tam nau kan. Nau aơ kơl rgum n’hâm dăng ngăn gay njêng âk rbăn ngih, đah nau dơi, nâp, thuk, ngăch, ueh ngăn ân ăp rnăk ach o, rnăk dơi kơl. Wa Rah Lan Chung, Groi Bí thư n’gor uỷ, Kruanh UBND n’gor Gia Lai, mbơh:

            ‘Nau kan jut ngih truh sat ân geh ƀư du trong rvah, ƀon lan ƀư tơm, tâm ban, đăp mpăn nâp nâl ndrel săk tam. Ân rgum âk ngăn nau dơi, nau tơm kan bah rmôt kan, ntŭk kan, rmôt kan, êng nŭih ndrel ƀon lan, n’ăp ma tâm ndrel bah dih n’gor. Ndrel ma nê, ân geh bonh đă ƀon lan rgop gay n’hao nau nâp ngih gŭ. Nkre lah, n’hao nau mêt uănh, năn rnê, nkhôm ăp rmôt, ăp nŭih geh nau blau ngăn”.

            Bôk nau kan jut ngih truh sat tâm Gia Lai dôl jêng nau ntrôl, njêng nau nsôih gay ƀon lan rklaih ach o, đăp mpăn nau rêh, rgop nau ndâk njêng ƀon lan Gia Lai nar lơn hun hao, sâm geh, ueh nâp. Tâm nê, ăp ntŭk kan Đảng hŏ ƀư ueh nau kan ‘chông cờ leo bôk” têk trong, nthoi ndrel njêng du nau kan rjăp, rêng nuih n’hâm tâm kơl lam rnoi mpôl, rƀŏng tât nkô̆ nau hun hao nâp tâm tâm n’gor Gia Lai./.