Năm aơ oh Nguyễn Ngọc Minh Tâm ta ƀon Brang, xã n’har bri Ia Púch, hao jrô 7. Aơ lah lor bôk năp oh gŭ ngai rnăk wâl, gŭ nội trú ta nhih nti n’hanh kêng dŭt pơh mơ plơ̆ sĭt jay.  Năm nti mhe, lăp tâm du ntŭk gŭ nti mhe, geh ndơ ma kơt nti, tiăr nti, pâl rlưn ƀư oh Tâm dŭt rhơn nđơr.

“Gâp dŭt nđơr tâm năm nti mhe yor gâp mbra kơi nti tay âk nău gĭt blău, âk môn nti n’hanh geh tay mông gay nti bài. Geh rnôk mô wât du đêt bài nti, gâp mbra ôp na nê̆ nai ntĭm ma mô kâp tât nar bah kơi tay. Rlău ma mông nti, mpôl hên hôm hăn rlong uănh saơ, hăn jŭr thư viện pơk uănh siƀŭt mô lah kêng măng hăn pâl cầu lông, chưng cầu đŏng. Nê lah rnôk mông nar pâl rlưn dŭt rhơn nđơr."

Ndrel đah nău nđơr bah kon se nti lah nău rhơn, nău đăp mpăn n’hanh bah ir mbăk anh jâk bah ăp me bơ̆ rnôk kon se dơi kơt nti n’hanh gŭ rêh nội trú ta nhih nti.

Năm nti dja, lĕ bar hê kon bah wa Rơ Mah Ca, rnoi Jarai, ta ƀon Chư Kó, xã Ia Púch, lăp nti nội trú da dê. Ur sai păng lah công nhân tor rtăk cao su, way hăn luh bah jay ntơm bah ôi rŭ, hôm plơ̆ sĭt tay gay năn njŭn kon hăn nti đŏng. Tâm khay ƀư mir mô lah ăp nar mih têh, gung trong bŏk mbĭr, mô năn njŭn wơt, păng pha lah an ăp kon rlu nti gŭ ta jay dơm.

Aƀaơ, rnôk ăp kon dơi gŭ, sa, kơt nti n’hanh rêh ta nhih nti ntơm bah bôk pơh tât kêng dŭt pơh. Ur sai wa Rơ Mah Ca mô hôm rvah rvăch nău njŭn wơt ăp nar, hôm ăp kon bah ir geh ma nău rlu nti đŏng yor ăp nking kol bah rnăk wâl n’hanh gung trong.

“Lah uĕh Đảng n’hanh Ngih dak hŏ rdâk njêng nhih nti nội trú têh uĕh. Ntơm bah aơ, ăp kon gâp dơi kơt nti, gŭ rêh, rlu rlău, pâl rlưn tâm nhih nti, tât kêng dŭt pơh mơ sĭt. Gâp dŭt rhơn nđơr ngăn.”

Nhih nti Phổ thông nội trú rep gưl Tiểu học n’hanh THCS Ia Púch năm nti dja geh 752 kon se nti, dơi tâm pă jêng 23 jrô. Gay me bơ̆ kon se wât kloh n’hanh tâm ban ŭch đah trong leo kơt nti mhe, ntơm bah kêng dŭt năm nti mhe 2025-2026, xã Ia Púch kan nsum đah ăp nhih nti tiểu học, THCS ta ntŭk rdâk njêng trong nchrăp njêng nhih nti phổ thông nội trú rep gưl. Tâm ăp khay rlu nti, pah kan sơch lăp nti, tâm pă nai ntĭm, dăp rgum jrô nti, nkual gŭ sa n’hanh ăp nău kan ntĭm nti dơi an ƀư ndrel du rơh.

Nai ntĭm Trương Duy Hồng, nai ntĭm ta nhih nti an gĭt, nău n’glăp dŏng nhih nti nội trú nai ntĭm ân rgâl trong leo ƀư n’hanh mât njrăng kon se nti đŏng. Nai ntĭm chủ nhiệm hŏ njêng rmôt Zalo, hop n’hanh tâm ôp na nê̆ đah tĭng rnăk wâl gay me bơ̆ kon se nti rƀah gĭt nău kơt nti, gŭ sa, rêh jêng bah kon se.

“Ăp nai ntĭm chủ nhiệm hŏ rgum hop me bơ̆ kon se nti, nhắn tin an me bơ̆ kon se tâm ôp mpeh trong kan bah nhih nti bán trú n’hanh nội trú. Lơn âk me bơ̆ kon se dŭt đăp mpăn. Yor khân păng gĭt kloh trong leo ƀư nhih nti dŭt têh, ăp tŏng ndơ dŏng, nkual pâl rlưn, ndơ ngêt sa, rlu rlău, dŭt đăp mpăn”.

Ndrel đah Nhih nti Phổ thông nội rep gưl Tiểu học n’hanh THCS Ia Púch, năm nti 2026-2027, nkual mpeh Nhâp nar n’gor Gia Lai hôm geh 6 nhih nti ndrel tâm ban kơt nê n’glăp dŏng, wơt kon se nti ta ăp xã n’har bri. Ăp nhih nti dơi rdâk ƀư ntơm bah khay 11/2025, tât aƀaơ hŏ lôch jêh ăp ndơ ntrŭp dŏng an ntĭm, gŭ sa n’hanh pâl rlưn. Lĕ rngôch 7 nhih nti hŏ dơi sơch rlău 6.800 kon se nti, lơn âk gŭ nti nội trú n’hanh bán trú.

Aơ lah nău rgâl dŭt njrăng uănh khlay đah nkual n’har bri mpeh Nhâp nar Gia Lai, ntŭk geh nklăp 90 km trong n’har bri, âk mpưm ƀon lan rnoi mpôl đê̆ gŭ rêh n’hanh ndơ rsong hăn, kơt nti bah kon se hôm mô đêt jêr jŏt. Đah trong ntĭt leo ƀư mhe, kon se nti mô dơn geh tay jrô nti, nkual gŭ sa ma hôm geh ntŭk gay pơk uănh siƀŭt, pâl thể thao n’hanh hăn uănh pâl ăp nău kan ntĭm nti bah dih mông đŏng. Khlay lơn, nău kơt nti bah ăp kon se dơi mât đăp mpăn, rgâl bah bah hôm ma nsing âk tâm nău njŭn wơt n’hanh gŭ rêh bah tĭng rnăk wâl.

Wa Phạm Văn Nam, Giám đốc Sở Giáo dục n’hanh Đào tạo n’gor Gia Lai an gĭt, ăp nhih nti nội trú rep gưl mbra rgop ntruch dăch bah tâm ƀah ntĭm nti đah nkual n’har bri đah ăp nkual dơh lơn, nkre njêng tơm nuĭh kan an n’gâng kan ta ntŭk.

“Nhih nti phổ thông nội trú rep gưl ta ăp xã n’har bri geh nkô̆ hôr dŭt khlay. Ăp kon se dơi mât chăm, mât mêr ăp tŏng, lĕ nuih n’hâm gay geh ndơ kơt nti uĕh lơn, rgop rgâl nău gĭt êng. Ăp nhih nti dja mbra ntĭm nti tơm nuĭh kan săk blău âk gay jêh aơ tay ăp kon se plơ̆ sĭt rhŏ dŏng ƀon tơm he nơm, rgop hun hao wăng sa- rêh jêng kon nuĭh ta ntŭk."

Ntơm bah khay plơ̆ tay nhih nti dja, kon se nti nkual mpeh Nhâp nar bah n’gor Gia Lai ntơm dơi kơt nti, gŭ sa n’hanh tiăr nti tâm du nhih nti ăp kôp. Nhih nti nội trú mhe mô dơn rgâl geh ndơ kơt nti nar aơ, ma hôm lah ntŭk ndơl jâng, chăt nar mpăr an nău rêh let năp tay bah kon se ta nkual n’har bri.