Ndơn nau jă bah Tổng thống Liên bang Nga Vladimir Putin, lơ 7/9, Tổng Bí thư, Kruanh dak Tô Lâm ndrel i ur ndrel rmôt kan gưl prêh Việt Nam tă bah Hà Nội hăn khâl gưl kan Ngih dak tât dak Nga. Aơ lah rơh hăn khâl gưl Ngih dak bôk năp tât Nga bah Nŭih dâk bôk Đảng, Ngih dak nơm kơp ntơm năm 1991, geh jêh rnôk Đại hội tal XIV bah Đảng ndrel rơh săch kan Quốc hội gưl XVI. Năm 2025, rnoh geh prăk tăch rgâl Việt Nam-Nga geh bơi tât 4,8 rmen đôla; 5 khay bôk năm aơ geh 2,16 rmen đôla, hao 6,4% rđil rơh aơ năm e. Kơp tât khay 7, Nga geh 223 nau kan ntuh kơl tâm Việt Nam, rnoh prăk geh bơi tât du rmen đôla; Viẹt Nam geh 19 nau kan tâm Nga, rnoh prăk đăng ký 1,64 rmen đôla.

Bar dak dôl ntrŭt dăng tâm boh tâm nau kan neh dak, rnă njrăng, ŭnh nar khoa học-công nghệ, ntĭm nti, văn hoá ndrel pâl n’aih; tâm nê geh nau kan Ntŭk ƀư nau kan mĭn njêng khoa học ndrel nau kan ndrak nsiu. Rơh hăn khâl rgop nau ƀư n’hêl ngăn trong kan tâm nchră đăp mpăn, ƀư tơm, âk ding, âk nau kan bah Việt Nam, yor nau geh dơi bah bar dak, yor nau đăp mpăn ndrel hun hao. Rơh khâl geh mpŏng njêng nhoat kan mhe, ntrŭt dăng tâm boh kan nsum ăp ntil Việt Nam-Nga hun hao rjăp, ngăn ndrel nâp nâl, nkre lah ƀư jru nâp lơn tay nau tâm rnơm nau kan ndrel nau tâm boh kan nsum vay ơm đah bar dak.