Tâm trôm nar lễ hội cà phê Buôn Ma Thuột tâl 9, ta Quảng trường 10-3, n’gor Dak Lak hŏ ƀư Nuĭh kan lŏ mir tâm rlong nău ngăch prăl năm 2025 đah nkô̆ “Mât chăm cà phê pet lât". 4 rmôt tâm rlong tât bah n’gor: Dak Lak, Kon Tum, Bình Phước, Sơn La hŏ râng rơh tâm rlong nuĭh ƀon lan kan lŏ mir ngăch prăl năm 2025. Aơ lah ăp rmôt tâm rlong dŭt ngăch prăl dơi sơch bah  ăp rơh tâm rlong bah năp nơh gay sơch luh ăp rmôt nuĭh tăm cà phê ntoh lư lăp tâm măng tâm rlong n’glĕ dŭt.

Đah nkô̆ “Mât chăm cà phê pet lât”, ăp nuĭh rlău 4 gâl tâm rlong: Nuĭh ƀon lan kan lŏ mir dăn mbah, nuĭh ƀon lan kan lŏ mir gĭt blău, ƀon lan kan lŏ mir tâm rgop kan nsum n’hanh ƀon lan kan lŏ mir ntul rlong. Ma ăp gâl tâm rlong ăp nuĭh tâm rlong hŏ mpơl dơi nău gĭt blău, nău tă ơm gĭt kan n’hanh gĭt wât dŏng ndơ pet lât rgâl mhe khoa học kỹ thuật tâm nău mât chăm cà phê bên di đah rgâl trôk nar n’hanh ăp nkô̆ nău geh tât nkret njêng, ntŭk tăch, tâm rgop tăm nsum, mât chăm geh siƀŭt kơp dơn, têh jêng n’hanh hun hao rêng kan tâm rgop tâm ndơ tăch cà phê Việt Nam.