Năm 2025 n’gor Kon Tum dơi Chính phủ jao rnoh tât hun hao GRDP 10%, dŭt âk Nkual Tây Nguyên. Nsrôih wat jêh ăp rnoh tât kan, ăp gưl, ăp n’gâng kan bah n’gor dôl nsrôih an ƀư âk trong nkra, tâm nê geh nău njêng tay suan rhôp an Nkual pâl nđaih neh dak Măng Đen gay rgop tâm hun hao 2 rnoh mbrô. PV Khoa Điềm, way gŭ ta nkual Tây Nguyên geh nău nchih nkoch tât.

Ntơm bah bôk năm tât aƀaơ Nkual pâl nđaih bri dak Măng Đen, nkuâl Kon Plông, hŏ wơt năch pâl nđaih “âk mpưm” đah rlău 374.000 tơ̆ âk rlău n’gul rnoh năch pâl nđaih tât đah n’gor Kon Tum. Wa Đặng Quang Hà, Kruanh UBND nkuâl Kon Plông, an gĭt, 3 năm mhe aơ tâm trong kan pâl nđaih bah nkuâl hun hao dăng, na nê̆ năm 2022 nkuâl wơt 600.000 tơ̆ năch pâl nđaih, năm 2023 lah 1 rkeh n’hanh năm 2024 lah 1,2 rkeh tơ̆ năch pâl nđaih.

Ndrĭ tĭng wa Đặng Quang Hà, nău dja jêng  lah mô geh  nău nkuâl hŏ rgop ngăn tâm hun hao 2 mbrô bah n’gor lah mô ndăn ngăch tĭng ƀư ăp trong nkra uĕh gay pâl nđaih hun hao jŏ jong:

“Mô geh trong nkra, mô n’gluh rnoh tât kan ri he mbra mô mât dơi bri dak rup uĕh măt uănh. Rdâk njêng rup gui pâl nđaih ân ndơ̆ luh âk nkô̆ nău tâm pah kan mât uănh ngih dak, tâm nău rdâk njêng săk ntơ lư, rdâk njêng rup gui bah Nkual pâl nđaih Măng Đen. Lah  ntơm bah aƀaơ mô rdâk njêng dơi săk ntơ lư, rdâk njêng rup gui n’hanh rdâk njêng văn hoá mbơh ngơi uĕh tâm nkual pâl nđaih Măng Đen ri let năp tay  ha mbra lâp tay du đêt nkô̆ nău khoah ta âk ntŭk đŏng”.

Gay rgop tâm hun hao 2 mbrô bah n’gor Kon Tum tâm năm 2025,  Nkual pâl nđaih bri dak Măng Đen dôl dơi njêng suan rhôp wăch rgum năch pâl nđaih. Mpeh măt mât uănh ngih dak, ăp gưl n’gâng kan nsrôih tĭng ƀư jăp pah kan mât uănh dăp rgum; dŏng trong n’glăp, trong kơl rgum geh nău tam tơm ndơ ntuh kơl rdâk njêng buăt nthoi ntung trong, ndơ dŏng rhŏ an hun hao pâl nđaih…

Đah 139 ntŭk rhŏ dŏng pâl nđaih manh gŭ nde ta nkuâl ân tŏng săk uĕh n’hanh văn hoá rhŏ an năch pâl nđaih. Wa Nguyễn Văn Tuấn, Giám đốc mât bôk kan Golden Boutique Hotel Măng Đen, an gĭt:

“Rnoh khlay n’gâng tơm gay kân jâng năch, gay an năch ŭch plơ̆ tay Măng Đen lah lĕ rngôch nuĭh kan ân pah kan ma nuih n’hâm bah he, uănh năl kơt lah nuĭh tâm rnăk wâl he nơm mât chăm ăp dăp dŭt rnoh. Mpôl hên way mĭn rvê tĭng nar, way rgâl mhe gay njêng luh muh măt mhe. Đah tơm ndơ mpôl hên mô rlu ntĭm nti n’hao hăr blău ti kan gay way blău ƀư mbro lơn”.

Gay năch pâl nđaih hăn tât đah Măng Đen mô dơn “Rdôl âk” tâm ăp nar rlu rlău, nar lễ tết ma rĭng ăp khay tâm năm, trong nkra mpeh âk ntil ndơ pâl nđaih dôl dơi n’gor Kon Tum n’hanh Hội Du lịch Măng Đen ntrôl dăng an ƀư. Ndrel đah “7 n’glău 3 leng”, ăp nkual wăng sa măng, Mir nghệ thuật Măng Đen, ntŭk pâl nđaih nsum mpôl ƀon Vi Rơ Ngheo, Kon Vơng Kia, tour pâl nđaih rlong uănh saơ joi gĭt văn hoá, bri dak... mhe jêng hŏ ƀư âk mpưm tay ndơ geh ƀư pâl nđaih kơl Măng Đen wăch rgum n’hanh kân jâng năch pâl nđaih.

Wa Bạch Thị Mân, Groi Giám đốc Sở Văn hoá, Thể thao n’hanh pâl nđaih n’gor Kon Tum, lah rjăp, đah nău nsrôih ndrel đah ndơ ơm geh, Măng Đen mbra rgop khlay tâm nău ŭch tât hun hao 10% bah n’gor tâm năm 2025:

“Măng Đen rgum ăp tŏng săk geh. Mpôl hên hŏ rgum rdâk njêng ăp ndơ geh ƀư ntĭt êng, pâl nđaih văn hoá, pâl nđaih lịch sử, pâl nđaih huêng khlay, pâl nđaih thể thao…Ntơm bah ăp jâng ntơm, săk geh mpeh bri dak n’hanh săk geh mpeh nău dêh rŏng kon nuĭh ri ăp nhih pah kan mât uănh Ngih dak geh nău kan nsum đah nhih pah kan mât bôk kan Ngih dak, doanh nghiệp ndrel du nuih n’hâm tĭng ƀư dơi ăp rnoh tât kan ndơ̆ luh”.

Pâl nđaih way dơi n’gor Kon Tum ntrŏng lah n’gâng kan tơm khlay tâm rnoh tât hun hao tăch rgâl-rhŏ dŏng bơi 13% tâm năm 2025. Đah nău dơh ơm geh n’hanh trong nchrăp hun hao ăp tŏng rêng, Nkual pâl nđaih bri dak gưl neh dak Măng Đen, nkuâl Kon Plông dôl ndrel ăp nkuâl, nkual ƀon têh êng ƀa ƀă bah n’gor Kon Tum nsrôih ƀư gay wơt tât 3 rkeh tơ̆ năch pâl nđaih gay rgop tâm nău hun hao nklăp 10% bah n’gor tâm năm aơ. Ăp năch pâl nđaih hăn tât đah Măng Đen mô dơn uănh saơ rup uĕh bri dak ma hôm rgop tâm nău hun hao wăng sa- rêh jêng kon nuĭh ta n’gor đŏng/.