Ta Ngih samƀŭt Phổ thông Nội trú 2 gưl Tiểu học-trung học cơ sở Dục Nông, ngih dôl jêh ăp ndơ ƀư n’glêh dŭt. Tâm ban đah nău ƀư, ngih samƀŭt ndăn săch kon hŏk gay tŏng ăp dơi ndơ̆ lăp dŏng tâm năm nti mhe 2026-2027. Tĭng trong nchrăp, Ngih samƀŭt Phổ thông Nội trú 2 gưl Tiểu học-Trung học cơ sở Dục Nông geh nklăp 1.680 kon hŏk. Tâm nĕ, rlău 1.140 kon hŏk dơi săch bah Ngih samƀŭt Tiểu học n’hanh Trung học cơ sở Đắk Dục; nklăp 550 kon hŏk săch mhe ta lam nkual gay nti tĭng trong ƀư nội trú.

Jêh rnôk dơi jao rnoh an, ngih samƀŭt lĕ ndâk njêng Ban ntĭm rđău, Hội đồng săch nti; tâm rgop đah n’gâng kan, ăp nsum mpôl n’hanh Mpôl pah kan Mặt trận ta thôn, ƀon tât tĭng rnăk ƀon lan nkoch trêng, mbơh tŏng ăp trong ƀư, nău kơl an kon hŏk nội trú. Wa Trần Đức Thư, Hiệu trưởng Ngih samƀŭt Phổ thông Nội trú 2 gưl Tiểu học-Trung học cơ sở Dục Nông an gĭt, tât aƀaơ, ngih samƀŭt lĕ săch tay geh rlău 360 kon hŏk mhe, geh rlău 65% rnoh an. Yơn lah, yor aơ lah ntrong ƀư rơh bôk năp ta lam xă jêng trong kan săch nti hôm e mâp jêr jŏt yor âk nuĭh hôm e klach rvê mpeh nău mât uănh oh kon:“Bah năp đaơ mô geh ngih samƀŭt nội trú jêng aƀaơ âk me bơ̆ kon hŏk hôm e rvê. Ngih samƀŭt dôl tâm rgop đah gưl ủy, n’gâng kan ƀon lan nkoch trêng, rgŏ jă gay me bơ̆ wât, nsing nơm n’hanh đăp mpăn ndơ̆ kon tât ngih samƀŭt”.

Ndrel đah săch nti, n’gor ndâk ƀư trong tâm pă rmôt nai gay tŏng ăp nău ntĭm bah năm nti bôk năp. Ta năp măt, ngih samƀŭt dŏng nâp ơm nai bah Ngih samƀŭt Tiểu học n’hanh Trung học cơ sở Đắk Dục; nkre kơp uănh tay, tâm pă n’hanh tâm ton nai tĭng nău ŭch ngăn.

Tĭng wa Trần Cao Bảo Việt, Kruanh UBND xă Dục Nông, nău ntuh kơl ndâk ƀư ngih samƀŭt nội trú 2 gưl lĕ rlău nău ƀư bôk năp, geh nău mpŏng kâp bah mê̆ bơ̆ đah ntŭk nti mhe. Xă lĕ dăn đă ăp ngih pah kan dơi kan ntop tay rnoh an săch dŏng nai tâm 2026 gay tâm di nău ŭch ntĭm n’hanh nti rnôk ngih samƀŭt na nê̆ dŏng. Đah nkual nội trú, ăp jrô gŭ dơi ƀư têh hvi, tŏng ăp ndơ dŏng gŭ âm. Tĭng nkô̆ nău rnoh kon hŏk dăn ngăn, xă mbra mbơh an gưl dơi mkra uănh mĭn tay trong tâm pă tay kon hŏk nội trú tâm di ăp nău dơi tĭng nău ntrŭnh. Wa Trần Cao Bảo Việt, Kruanh UBND xă Dục Nông an gĭt:  “Jêh rnôk săch mbra tĭng tâm rnoh kon hŏk na nê̆ tĭng jrô ri mbra mbơh hăn nău rgop UBND n’gor Quảng Ngãi n’hanh dăn trong ntĭm bah N’gâng kan Nội vụ n’gor Quảng Ngãi gay tâm pleh du đêt nai tâm di tâm ăp môn nti. NKre mpôl hên lĕ dăn nău rgop bah N’gâng kan Nội vụ n’hanh N’gâng kan Ntĭm nti n’gor Quảng Ngãi gay săch tay nai tâm năm 2026 ntop tay rnoh nuĭh an xă Dục Nông”.

Ta xă Sa Loong, trong kan nchrăp an ngih samƀŭt nội trú 2 gưl dôl dơi ƀư rĭng. Ndơ ƀư geh dĭng lĕ rnoh ntuh kơl bơi 209 rmen prăk, nchrăp jêh ta dŭt khay 7 năm aơ gay rhŏ an năm nti mhe.

Xă Sa Loong lĕ rgŏ jă ăp rmôt tâm rgop đah ngih sambŭt tât tĭng thôn nkoch trêng, mbơh đah me bơ̆ mpeh nău dơi nti ren, gŭ âm nội trú kơt ăp trong nău ntop kơl an kon hŏk. Wa Xiêng Thanh Phú, Kruanh UBND xă Sa Loong, n’gor Quảng Ngãi mĭn lah, tât aƀaơ, trong kan săch ntơm jêh tĭng nău nchrăp. “Ta nuih n’hâm Nghị quyết mrô 71 bah Bộ Chính trị, Đảng ủy n’hanh UBND xă Sa Loong mĭn n’hao ueh ntĭm nti, lơn lah ueh nâp rmôt nai, lah ngoăy tâm âk nău kan mhe bah năm kan 2025-2030. Xă mbra ntrôl dăng tay trong kan ntĭm nti, ntop tay nai ta ăp môn nti hôm mô tŏng, nkre ƀư săch dŏng rmôt tâm di nău kan way kan, tŏng ăp nău đă rgâl mhe ntĭm nti n’hanh tâm di đah nău geh ngăn bah ƀon lan”.

Gay nchrăp an năm nti mhe 2026-2027, UBND n’gor Quảng Ngãi lĕ uănh an trong nchrăp săch đah 4 ngih samƀŭt phổ thông nội trú 2 gưl tiểu học n’hanh trung học cơ sở ta ăp xă n’har bri neh kơh. Kon hŏk bah jrô 1 tât jrô 9 dơi săch tĭng trong uănh săch nti, mô ƀư tâm rlong. Nuĭh săch nti lah kon hŏk gŭ ta ăp xă n’har bri n’hanh ăp xă n’har bri neh kơh tĭng nău ntrŭnh.

4 ngih samƀŭt dơi jao rnoh săch nti geh Dục Nông, Mô Rai, Rơ Kơi n’hanh Sa Loong đah âk rlău 5.600 kon hŏk, tâm nĕ bơi 1.250 kon hŏk nội trú. Wa Nguyễn Ngọc Thái, Giám đốc N’gâng kan ntĭm nti n’gor Quảng Ngãi an gĭt, ndrel đah nău ntrôl ngăch ndâk ƀư ăp ngih samƀŭt nội trú 2 gưl, nău kan ntĭm nti dôl tâm rgop đah ăp ntŭk jêh lĕ rngôch trong săch, nchrăp ndoh ndơ gay ăp ngih samƀŭt ngăch wơt kon hŏk lăp năm nti mhe. “Mpôl hên lĕ tâm nchră an UBND n’gor Quảng Ngãi ntĭm rđău, rgŏ jă ăp rmôt gay ntop n’hao, ƀư măng, nsrôih jêh ơm. Nsrôih tâm khay 8/2026 mbra ƀư ăp gưl kơp uănh tay trong ƀư, samƀŭt samtra, răk rep n’hanh ndơ̆ an ntơm năm nti mhe di tĭng nău ntrŭnh bah n’gor”./.