Ta ăp chor jay nong djăr ta thôn Đoàn Kết, xă Tân Hội, n’gor Lâm Đồng, ăp păng pil măt nar tâm nthoi wơt duh nar. Tâm trôm, nong djărr dơi mât tĭng trong tŏng ăp; tăp djărr jêh rgum, uănh ntil n’hanh tâl dŭng dơi groi nđôi, joi tu tơm đah mã QR.

Aơ lah ntrong ƀư “Tăp djăr dak si” bah du doanh nghiệp, tâm rgop ŭnh nar kloh ueh, công nghệ sinh học, rgâl mrô n’hanh wăng sa tâm pleh. Điện măt nar kơl n’hŭch prăk dŏng; dak si n’hanh chế phẩm sinh học dơi ntop an ndơ sa; ăch chrach mât rong dơi mkra jêng phân hữu cơ. Wa Phạm Trọng Tâm, nuĭh tơm doanh nghiệp an gĭt, dôl ndâk ƀư trong nkra njêng kloh ueh n’hanh geh rnoh khlay âk lơn: “Mpôl hên mô tăch du tăp djăr dơm, ma tăch n’ăp nău nsing nơm n’hanh công nghệ, n’hao rnoh khlay tăp djăr, đăp mpăn săk nsum nsum mpôl n’hanh n’hao khlay wăng sa”.

Ntrong ƀư ta Tân Hội an saơ, khoa học ngăn ngên jêng rnoh khlay rnôk jêh mĭn njêng dơi an nkra njêng, tăch rgâl n’hanh dơi ntŭk rwăt djôt dơn. Aơ lah trong nuih n’hâm Nghị quyết 57 dơi rgop nanê̆ bah ăp nău ƀư ngăn ta Lâm Đồng rnôk rgâl bah mĭn njêng êng rai an mkra ăp nău ŭch na nê̆ bah nkra njêng. Đah lŏ mir, bah meng nkual tăm, rnoh mrô nkual tăm n’hanh ntŭk tâl dŭng, n’gor an jêh ăp nău prăp nđik, logistics, mât prăp, chrat ŭnh n’hanh mkra jêh pĕ lêh gay n’hao rnoh khlay ndơ. Tâm lvang 2026-2027, n’gor Lâm Đồng geh nău rƀŏng ntop kơl đêt ngăn 20 nău kan mĭn njêng n’hanh jao an công nghệ, 20 tâm ton kan mĭn njêng-hun hao, 30 doanh nghiệp rgâl mhe công nghệ n’hanh 300 doanh nghiệp jêt n’hanh nkre rgâl mrô; nkre jêng 3 ntrong ƀư kan ndrel tâm mĭn njêng, kơt dŏng n’hanh tâm rgop công nghệ.

Gay ăp nău rƀŏng aơ geh nău khlay ngăn ngên, ăp nău tâm rgop bah ndơi, nkra njêng tât nkret gâm n’hanh ntŭk tăch an dơi tâm rgop. Wa Nguyễn Ngọc Phúc, Groi Kruanh UBND n’gor Lâm Đồng, an gĭt, n’gor dôl an kơt dŏng nău mĭn njêng mhe gay n’hao săk rnglăy nkra njêng, jêh trong khlay n’hanh n’hao soan tâm rlong.

“Lâm Đồng geh âk ndơ mpeh lŏ mir công nghệ mhe, nkret njêng ndơ lŏ mir, ŭnh nar nkra njêng tay. Nău khlay an boăt nthoi ăp nuĭh jêng ăp trong tâm rgop na nê̆, jêng luh ndơ mhe, công nghệ mhe, trong nkra njêng mhe, nsĭt tay ăp nău khlay ngăn ngên an nuĭh ƀon lan, doanh nghiệp n’hanh jâng wăng sa bah n’gor hao jêng 2 rnoh mrô, n’hao rnoh mrô tâm rlong gưl n’gor”.

Bah ntrong ƀư tăp djăr dak si ta Tân Hội tât ăp nău lôch jêh trong khlay n’hanh rgâl mrô, Lâm Đồng dôl ntơm ndơ̆ Nghị quyết 57 lăp ngăn, rgâl khoa học, công nghệ n’hanh rgâl mĭn ƀư mhe jêng soan dăng an hao jêng wăng sa tâm n’gor.