Tâm rlău du khay 6 jrô trêng nti chĭng gong, ndăch rvăch n’hanh kơi năp nti nău blău pâl nđaih nsum mpôl dơi ƀư ta ăp ƀon nuĭh Rđe ta phường Buôn Ma Thuột, n’gor Dak Lak wăch rgum rlău 130 nuĭh râng.

Tâm nê, ăp jrô nti chĭng gong geh 60 nuĭh, dŭt jê̆ 8 năm deh, dŭt têh 35 năm deh. Rlău ma ăp nău chĭng gong tơm, nuĭh nti hôm dơi ăp bu hăr blău trêng nti ăp nău chĭng gong n’hao tay gay nchreng an djăt uănh tâm ăp lễ hội n’hanh nău kan pâl nđaih. Ăp jrô nti ndăch rvăch nkre đah nkô̆ tơm n’hanh n’hao têh blău tay, kơl nuĭh tiăr nti blău nău nchreng an djăt uănh n’hanh wât lơn mpeh rnoh khlay bah ntil ndơ njroh mprơ way ơm.

Lah ngoăy tâm ăp nuĭh râng nti ndăch rvăch, oh H’Na Si Mlô, ta buôn Đung, phường Buôn Ma Thuột, an gĭt, mô dơn nti ăp păk jâng ti, gâp hôm wât tay nkô̆ hôr tĭng nău múa, ntơm bah nê dêh rŏng n’hanh mpŏng mât ndray rup uĕh văn hóa bah rnoi nuĭh he.

“Gâp mpŏng lah geh tay âk rơh nti kơt aơ an ăp kon se rơh kơn bah kơi tay, dơi gĭt tât ndăch rvăch đŏng, gay nău ndăch rvăch dja mô roh hêng.”

Ndrel đah nê, pe jrô kơi năp nti nău blău ƀư pâl nđaih nsum mpôl tă bah giảng viên Nhih nti Cao đẳng Pâl nđaih Sài Gòn ntĭm nti hŏ năp an ăp kon se nti ta buôn Akŏ Dhông nău gĭt blău rhŏ năch, rhŏ ndơ ngêt sa n’hanh rdâk njêng trong ntĭt leo pâl nđaih nsum mpôl.

Wa Phạm Thị Hải Bình, Groi Giám đốc Ntŭk rgum pă an ndơ rhŏ dŏng n’gâng kan nsum phường Buôn Ma Thuột an gĭt, nău nkre trêng nti chĭng gong đah ntĭm nti nău blău ƀư pâl nđaih nsum mpôl lah trong rƀŏng hăn mhe gay njêng tơm nuĭh kan nđơn tay bah kơi nkre mât ndray văn hóa way ơm, nkre mât dŏng geh nău tam ăp rnoh khlay ƀon tơm ta ntŭk rhŏ dŏng pâl nđaih.

“Năm aơ, rlău ma ăp jrô trêng nti chĭng gong, ndăch rvăch, phường hŏ kan nsum đah Nhih nti Cao đẳng Pâl nđaih Sài Gòn pơk luh pe jrô nti n’hao blău tay rhŏ năch pâl nđaih, n’hao nău blău rhŏ ndơ ngêt sa đah ăp rnăk ƀon lan geh rhŏ ƀư ndơ ngêt sa n’hanh rdâk njêng trong ntĭt leo rlong saơ pâl nđaih nsum mpôl. Rlău ăp jrô nti, nuĭh nti dơi năp tay nău gĭt blău gay tĭng kơn rdâk njêng ăp trong ntĭt leo pâl nđaih rlong saơ ta ntŭk”.

Dŭt jêh ăp rơh nti, âk nuĭh hăn nti hŏ dơi rlong tŭr goh chĭng gong, ndăch rvăch n’hanh rƀah dơi ăp nău blău kan tơm tâm wơt, rhŏ dŏng năch. Trong ntĭt leo dja dơi mpŏng rgop mât ndray ntŭk tŭr goh chĭng gong Tây Nguyên nkre đah hun hao pâl nđaih nsum mpôl, nta joi geh trong rêh ta ăp ƀon lan nơm.