Âk năm ma aơ, bu ranh Phạm Văn Rôm, tâm xã Ba Vinh, n’gor Quảng Ngãi nsôih ntĭm nau tur chĭng pe ân rơh mom rnoi Hrê. Wa mbơh, aơ lah ntil ndơ dŏng ueh ngăn bah rnoi H’rê, leo tât nau ueh huyêng khlay, lah mâng ueh ân nau sâm geh ndrel nau dăng dơi bah rnăk vâl tâm ƀon lan:     ‘Tât bôk năp lah nơm mât ndrel ƀư ân ueh nau ơm yau bah rnoi H’rê nơm. Tal bar lah ăp nŭih blau dŏng Chĭng pe geh tă bah ơm jŏ hôm, ndri ma Chĭng pe bah rnoi hrê geh nau khlay ngăn, nơm ân mât nau ơm ueh bah rnoi H’rê”.

            Nŭih tur chĭng pe bah rnoi H’Rê hŏ geh kơp dơn lah ndơ ơm yau bah neh dak. Wa Trần Thị Thanh Thuý, Groi Kruanh UBND xã Ba Vinh mbơh, n’gor ntrŭnh ƀư bôk nau kan mât, ƀư ueh nau khlay ơm aơ tâm nau leo dŏng ƀư pâl n’aih. Tât rnôk aơ, xã hŏ ndâk ƀư geh 4 rmôt ƀư nau kan njroh mprơ tâm 4 thôn ndrel dôl lŏ ndâk njêng bôk nau kan mât, ƀư ueh ndrel ƀư rêng tay nau ơm khlay chĭng pe ndrel ăp nau njroh nau mprơ ueh bah bu ur druh rnoi H’rê.  Xã hŏ pơk âk jrâu ntĭm nti nau kan ntĭm nti tur chĭng pe ndrel nau kan ntanh njuh, gay mât ndrel ƀư ueh ăp nau khlay ơm yau ueh bah rnoi H’rê, rgop nau hun hao nau kan pâl n’aih nsum mpôl, pơk nau geh dơi jêng bah ƀon lan:            ‘Aơ lah nau kan ƀư ueh ngăn tă bah nau kơl an Bôk nau kan neh dak ndrel mra lŏ geh ƀư pơk rêng hvi tay ntrong ƀư ăp nau kan geh dơi bah kônh wa mpeh nau jŏ jong. N’gor dôl ŭch mra tâm rgop nsum lĕ bah ăp bôk nau kan gay ntuh kơl njêng jêng ăp ntil ndơ ma yor kônh wa nơm geh tă bah ăp jrâu kan ntĭm nti kơt aơ”.

            Ntơm bah bôk nau kan bah neh dak, âk rnoh nau khlay ơm yau vay ơm bah rnoi Cor kŏ geh mât ndrel ƀư tĭng ueh. Tâm ăp xã gôl yôk n’gor Quảng Ngãi, ăp ntil nau ƀư nau kan kơ lah tur chĭng, njroh Cà đáo, ndâk n’gâng njuh ndrel ăp nau ƀư nau ơm yau ơm ueh geh ndâk, ntĭm nti ân rơh mom. Âk năm ma aơ, wa Hồ Ngọc An tâm xã gôl yôk Trà Bồng nsôih ngăn ma nau kan ntĭm nti nau ơm yau bah rnoi Cor tâm ngih săm ƀŭt. Wa rhơn ngăn rnôk ma nar lơn ma geh âk băl mom ŭch rŏng nau ơm yau rnoi mpôl:    ‘Dŭt n’gâm geh nau ntô̆ n’hao ngăn rnôk geh dơi ƀư nau kan ân rnoi mpôl nơm, mât ndrel ƀư nâp. Săk gâp nơm kŏ lah nŭih geh ntĭm nti tay nau kan ơm yau ân ăp kon se nti tâm ngih săm ƀŭt nội trú Trà Bồng ri ma gâp saơ rhơn ngăn. Ăp rnôk ƀư lễ hội Ngả Rạ bah ăp ngih săm ƀŭt kŏ geh ƀư đah ăp nau ơm yau bah rnoi Cor”.

            Năl nau ơm yau ueh ơm bah nơm nê lah ntrong dơi gay hun hao pâl n’aih nsum mpôl, ăp nkuăl gôl yôk n’gor Quảng Ngãi geh nsum ma nau mât ƀư hun hao pâl n’aih nsum mpôl, ăp nhoat njêng jêng nau kan geh dơi bah nŭih ƀon lan. Wa Đỗ Khắc Phi, Groi Kruanh UBND xã Trà Bồng, lah rjăp:‘Ntơm bah tơm prăk ƀư Bôk nau kan mrô 6 bah Bôk nau kan neh dak hun hao văng sa rêh jêng nkuăl rnoi mpôl đê̆, UBND xã rgum ƀư nau kơl an gay ntuh kơl kŏ kơt lah ƀư ueh lơn tay nau mât ndray ăp nau kan ơm yau ueh tâm nkuăl. Ngăn lah nau ntĭm nti ăp nau ueh bah rnoi nơm; rvăt năp ăp ndoh ndơ dŏng kŏ kơt lah ntuh kơl ƀư nkra tay ăp ntŭk kan dŏng ƀư nau rƀŭn rgum ân ăp thôn. Tâm rơh tât, phung hên mra lŏ rgum ƀư tu tơm tă bah ăp bôk nau kan, gay hun hao văng sa rêh jêng nkuăl rnoi mpôl đê̆ ndrel gôl yôk”./.