Ta tổ dân phố Ƀon Đưng 1, phường Lang Biang- Đà Lạt, wa Păng Ting Sin, nuĭh K’Ho Lạch, âk năm aơ hôm nha rnhôn đah nău kan ntĭm nti chĭng gong, tâm pât mprơ n’hanh ăp ntil ndơ uh goh way ơm. Lah Bí thư Chi bộ, nkre lah kruanh rmôt tur chĭng ƀon Đưng đah 15 nuĭh kan ndrel, wa way geh uănh nău kan mât rbăy nău ueh êng lah nău kan bâh nơm đah ntŭk rêh jêng. “Lah ma he mô geh mât rbăy n’hanh n’hao nău way ơm aơ rĭ mbra ntơm roh rui dơm nău ueh êng. Đah nuĭh ƀon lan rnoi đê̆ ta jâng yôk Lang Biang ŭch nti tay an kon său ngăn lah nău văn hoá chĭng gong lôch nĕ lah nău tâm pât mprơ. Mât rbăy n’hanh n’hao nău way ueh êng rnoi nơm ta ntŭk, nti tay an rơh ba kơi”.

Bâh ăp nuĭh bu gru âk năm deh ta ăp thôn, ƀon bâh n’gor Lâm Đồng, nău rŏng đah nău way ueh êng dôl geh mbơh ndơ̆ tay an rơh mom ba kơi. Dơn mbơh nti nău way ơm bâh  ăp bu gru  âk năm deh, rơh mom nar aơ lĕ dôl geh ndơn kan ntrong kan mât rbăy nău ueh êng. Nô Kră Jăn Jun Guy, nuĭh K’Ho  Lạch ta tổ dân phố Dang Ja, phường Lang Biang- Đà Lạt lah nuĭh kan ndrel ta mpôl bu gru geh 22 nuĭh. Đah nô, ăp tơ̆ geh njroh chĭng gong mô dơn lah geh mbơh nău ueh way êng ma hôm nha lah ntrong kan gay ma rơh mom n’hao rnê tay tu tơm. Nô Kră Jăn Guy nkoch:  “Ăp ntil ndơ ma u che nklơi tay gay  an he kơt lah nău tâm pât, ndơ uh goh, tâm ban kơt nău njroh xoang way ơm. an geh mât rbăy tay n’hanh pă tay an rơh ba kơi. Mpôk he mô dơi an roh ăp nău ueh êng bâh rnoi nơm”.

Ta nklang bri yôk Lang Biang, nău nteh chĭng gong hôm nha n’gloh mbro rnôk ta ƀon lan geh tâm mâp tâm nđur. Ta ăp mâng tanh way ơm, ăp rse brai hôm nha geh toăk tanh ăp ntil ndơ cheh ndrang tĭng nău kahgĭt ueh bâh âk rơh. wa Ƀon Jô Liên, groi kruanh Uỷ ban MTTQ Việt Nam, kruanh Hội liên hiệp bu ur phường Lang Biang-Đà Lạt lah na nê̆. "Ăp nuĭh geh nău knơm ta phường Lang Biang - Đà Lạt geh mât nău kan dŭt khlăy ngăn. Khân păng lah ntung njŏ bâh Đảng, pháp luật bâh Ngih dak gay ma bâh nĕ dăch ƀon lan đah Đảng lơn, dăch đah Ngih dak lơn. Năp lor khân păng lah nuĭh hăn lor, lôch nĕ mbơh tơih an rnăk vâl n’hanh ntŭk rêh jêng ndrel geh ƀư tĭng ăp nău ntrŭnh bâh Đảng, nău kơl pháp luật bâh ngih dak  an geh ueh ngăn”.

Ta xã Đơn Dương, ntŭk ƀon lan rnoi đê̆ geh bơi tât 40% rnoh nuĭh, âk ƀon pah kan way ơm n’hanh ăp câu lạc bộ chĭng gong hôm nha pah kan săk rnglăy bah geh nău hăn ndrel bâh rmôt kan aơ. Wa Lê Thị Hồng Nhung, Groi kruanh ntŭk kan văn hoá- xã hội xã Đơn Dương an gĭt.“Xã Đơn Dương geh du ƀon nău kan kơt nău ƀư rgên kông ta thôn Ha Wai, lôch nĕ tanh sah ta thôn Đa Hoa, lôch nĕ geh du câu lạc bộ chĭng gong. Ăp nuĭh geh nău knơm tâm rgop mbơh tơih tâm rgop mbơh nău ntrŭnh, trong kan nău kơl bâh Đảng tâm ban kơt mbơh nti, n’hao ăp nău khlay bâh ƀon pah kan ta ntŭk. Khân păng tâm rgop đah kruanh thôn, Bí thư chi bộ tâm ban ăp n’gâng kan, ăp ntŭk kan, ăp mpôl kan, ăp ntŭk phung chroh hăn ndrel đah ta ntŭk tâm nău mât rbăy nău way ơm.

Bâh ăp ntil mâng tanh ta Đạ Huoai, Cát  Tiên tât nău nteh chĭng ntoh n’gôr bâh yôk bri Lang Biang, mbra dơi saơ nău ueh êng dôl geh ndâk nsơm đah mpang ti bâh ntŭk rêh jêng. Ntil ndơ geh mât rbăy, mbơh pă n’hanh ndrel đah nău hun hao pâl nđaih lah ntrong kan gay ma mbơh nău khlăy ueh êng jêng nău nsrôih hun hao wăng sa, rdâk njêng Lâm Đồng hun hao ngăch, nâp nâl.