Bôk khay 7 mhe rlau, Giải Võ thuật ơm yau ăp Võ đường Bình Định tâm rlong Cúp Hoàng đế Quang Trung tal VIII năm 2026 geh ƀư, đah nau râng bah rlau 700 võ sư, võ sinh tât tă bah 75 ntŭk ntĭm nti võ ndrel rmôt ntĭm nti tâm ndrel bah dih n’gor. Wa Bùi Trung Hiếu, Groi Giám đốc Sở Văn hoá, Thể thao ndrel pâl n’aih Gia Lai rhơn lah, võ ơm yau Bình Định lah nau ơm ueh geh rgum tă bah nau ơm yan ndâk neh dak, mât neh dak bah rnoi mpôl:

            ‘Lơ 31/3/2025, Thủ tướng Chính phủ tâm ban nau njoăl săm ƀŭt mbơh tât UNESCO uănh gay ma nchih moh săk Võ vay ơm Bình Định tâm moh săk ăp ntil ơm yau ueh mpơl săk ntoh măt ân rnoi nŭih. Aơ lah nau ueh ngăn, dŭt n’hâm geh nau rhơn đah Võ vay ơm Bình Định, mô êng lah nau ntô̆ n’hao nau leo ndơ ơm yau neh dak tât đah lam ntur neh, ma hôm rgop nau n’hao nau mĭn, nau kan bah ƀon lan tâm nau kan mât ndray, mât rjâp ăp ndơ ơm yau ueh bah rnoi mpôl”.

            Ntơm lơ 26/7 tât lơ 2/8, Giải vô địch Võ vay ơm ăp mrôt kan tâm rlong bah lam ntur neh mra geh ƀư ta Quy Nhơn-Gia Lai, đah nklăp 650 nŭih râng, nau tâm rlong tâm ăp nkô̆ nau geh quyền thuật ndrel đối kháng. Êp nau tâm rlong, rnâng kan hôm pă ƀư ăp rmôt kan tă bah ăp dak râng hăn uănh tâm An Khê Trường, chùa Long Phước ndrel tháp Bánh Ít gay uănh nau ơm yau, nau ueh khlay ndrel ăp ntil ndơ kăl e bah nkuăl neh Gia Lai.

            Jêh nê, ntơm lơ 2-5/8, nau tâm rlong bah lam ntur neh Võ vay ơm Việt Nam tal IX-Gia Lai năm 2026 mra geh tâm phường Quy Nhơn ndrel du đê̆ n’gor tâm êp ma nê, đah nkô̆ nau “Võ ơm yau Việt Nam-Nau ueh ntoh ang’. Nau kan rgum geh 16 rmôt tă bah 9 neh dak, ndrel 43 rmôt kan tâm rlong tâm dak ndrel 11 rmôt tâm rlong võ thuật bah n’gor.

            Nau ueh ngăn bah rơh tâm rlong lah nau rgum ƀư bah rlau 1000 nŭih võ sư, võ sinh đah ăp nau ƀư nkoch mbơh nau dăng săk ndrel nau jănh nâp-nau ƀư geh ntoh lư ngăn geh ma nau mơng bah nkuăl neh Tây Sơn, ntoh nuih n’hâm ŭch rŏng đah võ ndrel nau ơm yau ueh bah võ vay ơm Bình Định. Nau mhe bah rơh tâm rlong tâm năm aơ lah bôk nau kan ƀư rgum âk nŭih, rgop nau ƀư ân jêh săm ƀŭt dăn leo Võ vay ơm Bình Định mbơh ân UNESCO nchih moh săk lah Ndơ ơm yau ueh ntoh măt ân rnoh nŭih.

            Tĭng wa Nguyễn Thị Thanh Lịch, Groi Kruanh UBND n’gor Gia Lai, n’gor dôl ăp nhoat ƀư hun hao nau kan “văng sa ndơ ơm”, tâm nê võ vay ơm geh năl lah ngoai tâm ăp nau khlay tơm ngăn gay hun hao nau pâl n’aih, nau ơm yau ndrel n’hao nau tâm n’ur bah lam ntur neh. Bah ăp rơh tâm rlong, ăp đah ding tâm rlong tâm dak ndrel dak ba dih geh nau khêp gay tâm mâp, tâm kơt tĭng nti, rlet rlau nau rdâng bah bâr ngơi gay ma dŏng nau geh rbăng nsum bah võ thuật, bah nê ƀư rjăp tay nau tâm boh ndrel ƀư rêng tay nuih n’hâm ŭch đah võ Việt Nam:

            ‘Nkô̆ nau bah phung hên bah ăp rnôk tâm n’ur, ăp rmôt tâm rlong võ tâm dak geh tâm nchră ndrăng nơm ndrel ngăn lah geh dơi tâm nchră đah dak ba dih, nkre nkoch mbơh nau ueh, nau ơm yau võ bah n’gor. Mra lah geh đŏng nau nkol mpeh nau ơm, nau nkol mpeh nau tâm ngơi, yơn bah ăp nau tâm nchră nkoch tât võ thuật ri mra n’hao tay nau tâm rnglăp. Ndrel tâm âk năm ma aơ, võ ơm yau bah n’gor hŏ ndơn geh nau kơl an âk ngăn tă bah ăp ding ƀư ntĭm nti võ bah lam ntur neh. Bah 9 rơh tâm rlong, hŏ njêng jêng nau tâm rŏng, nau tâm kơl an rêh ngăn đah bu năch tă bah dak ba dih”.

            Ntơm bah ăp ntŭk tâm rlong ueh, janh tât ăp nau nkoch mbơh rgum nsum bah âk rbăn nŭih, ntơm bah ăp nau tâm n’ur ơm yau tât nau mpŏng ŭch leo nau ơm yau Việt Nam hao tât lam ntur neh mô knŭng geh mât tâm ăp nau ƀư, nau kan, ma hôm geh nthoi đah nau tâm rŏng, nau ntô̆ n’hao ndrel nau dăng dơi bah ăp rơh nar aơ đŏng./.