Tâm rơh hô ngăn bah lơ 23 tât 26/7, Công an n’gor Lâm Đồng ƀư sŏk dơn 1.521 ntil ndơ ADN bah nuĭh bên tahen khĭt kăl e tĭng jrŏng rnoi me. Nău sŏk ntil ndơ dơi ƀư du rơh ta 16 ntŭk rgum ta lam n’gor n’hanh 3 rmôt hăn tât jay ăp Mê̆ Việt Nam Janh dăng, nuĭh bên tahen khĭt kăl e âk năm săk ranh, n’hâm soan mô ngăch mô lah mô dơi hăn nsong. 

Geh măt bah ôi ơm gay ƀư sŏk dak mham, wa Phùng Thị Huệ, nuĭh bên tahen khĭt kăl e Nguyễn Văn Thái, nkoch nău mpŏng ŭch ơm năl săk nuĭh bên gay rnăk wâl n’hanh kon sau geh ntŭk su nhang. “Mpŏng ŭch têh ngăn bah rnăk wâl lah năl di săk bah che. Aƀaơ n’gu môch lĕ ndơ̆ sĭt nghĩa trang yơn mô hŏ geh săk. Mpôl hên knŭng ŭch rnôk kon sau tât su nhang ri gĭt di ntŭk, di nuĭh gay nkah gĭt”.

Nău sŏk dơn nting mham ADN mô knŭng rhŏ an ndâk njêng nkô̆ nău samƀŭt samtra năl săk tahen khĭt kăl e ma hô ƀư lĕ đah nău kan, nuih n’hâm nkah gĭt đah ăp nuĭh lĕ roh yor đăp mpăn, dah rŏng neh dak. Thượng tá Võ Xuân Bình, Groi Jrô kan Cảnh sát mât uănh hành chính mpeh đăp mpăn nău rêh jêng, Công an n’gor Lâm Đồng an gĭt, rmôt công an lĕ rgŏ jă dŭt n’hâm nuĭh kan, ndeh rklư gay nta nơih ngăn an nuĭh bên tahen khĭt kăl e râng sŏk mham.

Băng: “Công an n’gor lĕ ndâk ƀư 16 ntŭk sŏk dơn nting mham ADN ta lam n’gor n’hanh 3 rmôt hăn tât tâm jay ăp Mê̆ Việt Nam Janh dăng, nuĭh bên tahen khĭt kăl e ranh mô ngăch, hăn nsong jêr jŏt. Mpôl hên nsrôih jêh nău kan di ngăch, đăp mpăn  uĕh nâp n’hanh đăp mpăn samƀŭt samtra”.

Du ntil nting mham ADN dơi ntop tay mbra pơk tay dơi năl săk du hê tahen khĭt kăl e mô hŏ di kloh nău mbơh, rgop ƀư săk rnglăy Bôk nău rgop an tâm nchră ndâk ƀư ntŭk mât prăp gen tahen khĭt kăl e n’hanh tâm di nău mpŏng kâp bah âk rnăk wâl jêh âk năm kâp nuĭh bên dơi plơ̆ sĭt đah ƀon tơm, năm deh săk bah nơm./.