Rnăk wâl nô Điểu Đên lah ngoăy tâm 60 rnăk nuĭh rnoi mpôl đêt ta ƀon Bu Lum, xă Quảng Trực, n’gor Lâm Đồng dăp sĭt gŭ tâm nkual jay mhe kloh ueh yor ngih dak ndâk ƀư. Nău răm bah nô ndrel kônh wa dơi ntop tay rnôk jay mhe hăn ndrel ntung trong điện, ngih samƀŭt lĕ jêh. Nô Điểu Đên nkoch, điện jay mhe dŭt uĕh n’hanh đăp mpăn, đêt geh nsĕt điện jêng nô lĕ dŏng 2 rkeh prăk dơi ngih dak an gay rwăt glah điện, glah dak điện. Aƀaơ ur sai nô mbra ntêm prăk gay rwăt tay tủ nđik, kăt set djăt n’hanh nô mpŏng ăp nkual ƀon lan rnoi mpôl đêt ta ăp xă êng dơi kơt nĕ đŏng. Nô Điểu Đên nkoch: “Gâp saơ Đảng, Ngih dak uănh tât lơn ƀon lan n’har bri dŭt âk. Tâm ƀon aơ kônh wa dŭt rhơn, kônh wa jăng lĕ jay gŭ ngai gay sĭt ta aơ uĕh lơn, geh điện dơh lơn. Gâp mpŏng ngih dak uănh mĭn tay, uănh kơl tât ăp ƀon êng, ăp rnăk mô hŏ geh điện gay khân pơng dơi dŏng điện kơt ta aơ”.

Ta meng ƀon Bu Lum lah ƀon Bu Dar. Bah rnôk geh điện ngih dak, âk jay nglăp êng ŭnh n’hanh camera rƀŏng mpeh trong hăn, nkre sol ang an hăn nsong rnôk măng mih sial, nkre ngăch ntop kơl nuĭh hăn trong rnôk geh nău n’hanh n’ăp njrăng n’gang nuĭh ntŭng. Nău kan mât uănh ƀon bah Kruanh ƀon Bu Dar-wa Vũ Minh Tiến yor nê ma dơh đŏng, săk rnglăy âk lơn: “Điện tât ri rgâl mhe âk an xă n’har bri, kônh wa rhơn. Tâm ƀon aơ 2-3 jay dŏng nsum du công-tơ gay tŏ djrah rnôk tâm yan yor điện 3 pha dŏng dơh lơn đah dŏng măy pring. Điện pơk ang rgop n’hŭch prah tâm tom ndeh, âk rnăk hôm nglăp camera gay njrăng ntŭng rmoănh”.

Nău trong rse điện ngih dak dơi ntuh kơl tât nkual n’har bri lĕ jêng dơh gay ntŭk kan ƀư săk rnglăy nău kan mât uănh, mât njrăng ƀư tơm, rnă njrăng n’har bri neh dak. Tĭng Thượng tá Phan Văn Khá, Chính trị viên Pôih tahen n’har bri mpông n’har bri Bu Prăng, trong rse điện dơi ndâk ƀư, nâp nâl n’hanh mât na nao nău kan đăp mpăn lĕ rhŏ an săk rnglăy trong kan ntĭm rđău, ƀĭt joet, tŏng ăp nău mbơh ôp ƀư tĭng nău kan. Thượng tá Phan Văn Khá an gĭt tay:

 “Nău ndrăng điện sĭt nkual jru ngai lĕ rgop hun hao wăng sa n’hanh đăp mpăn mât njrăng bri dak rnă njrăng. Đah kônh wa, rnôk geh điện ri geh ndơ kơt dŏng ăp ntil, khoa học kỹ thuật gay hun hao wăng sa, đăp mpăn nău rêh. Đah cán bộ tahen ntŭk kan, điện kơl ƀư uĕh nău kan tahen njrăng n’gang neh dak, n’har bri, ntrôl dăng rgâl mrô tâm trong kan”.

Wa Trần Minh Huy, Kruanh Điện lực Tuy Đức, Công ty Điện lực Lâm Đồng (Tổng công ty Điện lực miền Nam), an gĭt ta ntŭk n’har bri, nkual jru ngai, nău tŏng ăp pơk điện đăp mpăn n’hanh na nao mô knŭng rhŏ an hun hao wăng sa, rêh jêng ma hôm rgop ndrel n’gâng kan n’hanh rmôt kan dơi kan mât nâp njrăng n’gang neh dak, rnă njrăng, ndâk njêng nkual n’har bri đăp mpăn. “Tuy Đức lah ntŭk n’har bri jêng trong điện dŭt jêr yơn knơm dơi uănh tât ntuh kơl jêng tât aƀaơ lĕ ntơm đăp mpăn trong điện, 99% ntŭk geh điện. Ăp nău nchrăp ƀư đăp mpăn ƀon lan n’har bri lah nău nchrăp ƀư khlay bah Chính phủ n’hanh rnôk mbơh ƀư ri geh trong điện, an đăp mpăn pơk điện an ƀon lan n’har bri, đăp mpăn pơk điện an rnă njrăng mât njrăng bri dak”.

Kơt nĕ đŏng, điện ngăn ngên lĕ rgop uĕh tâm hun hao wăng sa, đăp mpăn nău rêh, đăp mpăn rnă njrăng nkual jru ngai, nkual n’har bri xă Đăk Wil, n’gor Lâm Đồng. Ăp năm bah năp, điện ngih dak lĕ jêng nuih n’hâm khlay ntrôl hun hao wăng sa ta ntŭk. Trong điện đăp mpăn kơl nuĭh ƀon lan janh ntuh kơl măy mŏk, trong rse điện tŏ ntêm nkrem, kơt dŏng khoa học kỹ thuật an nkra njêng, n’hao săk rnglăy n’hanh uĕh ăp ntil tơm tăm khlay kơt cà phê, tiêu, sầu riêng n’hanh âk ntil tơm tăm sa play. Kruanh UBND xă Đăk Wil Hoàng Văn Tám uănh lah prêh:  “Ƀon lan uănh lah prêh nău rgop bah nău kan điên an ntuh kơl n’hao trong rse điện ta xă n’har bri Dak Wil, rgum jêt tâm ƀah đah ƀon lan xă n’hanh ăp ntŭk êng. Điện tŏng ăp pă an điện đăp mpăn nkra njêng gŭ âm, rgâl muh măt ƀon lan, nta an ƀon lan ƀư trong pơk ang, nuĭh ƀon lan hăn nsong dơh, đăp mpăn ntung trong, mât uĕh rnă njrăng đăp mpăn, njrăng n’gang nău tih”.

Trong sre điện mô knŭng rhŏ an nău ŭch dŏng, nkra njêng bah nuĭh ƀon lan, ma hôm đăp mpăn pă an ăp ntŭk ƀon lan gŭ rgum, ăp pôih tahen n’har bri n’hanh rmôt kan doll nar măng pah kan mât njrăng n’har bri. Lơn lah, ăp nău nchrăp ƀư đăp mpăn ƀon lan gŭ nkual n’har bri lah nău ntrŭnh têh bah Ngih dak; tâm nĕ, trong rse điện dơi mĭn lah ngoăy tâm âk n’gâng tơm gay nuĭh ƀon lan đăp mpăn gŭ âm, hun hao nkra njêng.