Ntŭk rgum tơm tâm măng tŭr goh chĭng gong đah nkô̆ “Nău goh nteh nar jêng ur sai” lah mpơl tay nău way ơm wơt sai tâm nar tâm nđăp way ơm bah nuĭh Rđe. Tâm ntŭk nđik aih n’hâm tơm si têh, ăp bu hăr blău buôn Tơng Jŭ, phường Ea Kao hŏ mpơl tay ăp tŏng nău way wơt sai (Iêô wĭt sang mniê) bah nuĭh Rđe. Ta trong hăn jăt ur, klay rlău dŭt âk ntul rlong tĭng nău way. Păng nkăp tĭng kông koh n’hanh ndơ nđăp ur an tĭng băl mpôl bar ding lor rnôk wơt lăp tâm jay ur ƀư sai. Đah nuĭh Rđe, kông koh lah ndơ ntĭt bah nău tâm rŏng du nuih n’hâm, hôm ăp ntul rlong ta trong hăn jăt ur njuăl nău ŭch rŏng mpŏng geh ur sai du nuih n’hâm rlău jêr jŏt gay rdâk njêng nău rêh rhơn răm.

Bu hăr blău Y Djing Adrơng, buôn Tơng Jŭ, an gĭt, nău n’glăp nău way ơm rhŏ dŏng năch nkre rgop mât ndray săk tơm, nkre pơk tay trong geh pâl nđaih an ƀon lan.

“Gâp dŭt rhơn n’hao dơi râng mpơl tay nău way ơm wơt sai, nkah tay nău way ơm, rup uĕh săk tơm văn hóa bah nuĭh Rđe. Buôn Tơng Jú aƀaơ ƀư pâl nđaih nsum mpôl, aơ lah trong rƀŏng hăn dŭt uĕh nta joi geh nău kan an kônh wa, nkre mât ndray săk tơm văn hóa bah ƀon lan kơt cheh tanh bok brai, tŭr goh chĭng gong mô lah mpơl tay nău way ơm kơt nar aơ. Gâp mpŏng rnoh khlay văn hóa bah nuĭh Rđe dơi rêng lam gay âk nuĭh lam ntŭr neh gĭt tât n’hanh mât ndray mbro.”

Lôch mpơl tay nău way ơm, nuĭh djăt uănh saơ na nê̆ ăp nău chĭng gong, dĭng dưt rla, gong rêng, ăp nău mprơ geh ring tam Tây Nguyên n’hanh rlong saơ văn hóa ndrănh yăng. Ăp nău kan hŏ an tay âk nău nkah uĕh đah năch tâm n’hanh bah dih dak. Wa Steve, tât bah Scotland, an gĭt, ăp nău nteh chĭng gong n’hanh trong ƀon lan ta ntŭk mât ndray văn hóa ƀư an păng dŭt rhơn mƀak.

“Aơ lah lor bôk năp gâp dơi uănh saơ n’hanh gâp saơ dŭt ŭch. Gâp dŭt ŭch ndơ uh goh nău mprơ bah nuĭh Rđe. Tĭng gâp, ăp rnoh khlay văn hóa kơt aơ ân dơi nkoch mbơh âk lơn ta ăp ndơ nkoch trêng nău lư gay âk nuĭh gĭt tât. Nklăp gâp mbra plơ̆ tay”

Tĭng trong nchrăp, bôk nău kan nchreng an uănh chĭng gong mbra dơi ƀư tay ăp khay ta Bảo tàng Dak Lak. Ăp khay n’gor mbra nkoch mbơh du nău way ơm bah ăp rnoi mpôl đê̆ ta ntŭk, rgop mât ndray drăp ndơ ơm yău ntlơi an tay n’hanh rdâk njêng tay ndơ geh ƀư pâl nđaih văn hóa rhŏ dŏng năch.