Đah pŭt nđĭr lir lar bah bri Nâm Nung, nteh dak bah Leng ôm Rveh n’gul bri krŏng kơt nău kuăl jă năch pâl nđaih tât hăn uănh nkual neh âk nău ueh bah nuĭh Bunong. Nô Y Krêu, Kruanh rmôt ƀư ngăn tâm bri bah Rmôt pâl nđaih nsum mpôl Yôk Nâm Nung, xă Nâm Nung, n’gor Lâm Đồng nkoch: “Tĭng nău nuĭh ranh nkoch, kăl e ta nkual aơ du du mlâm rveh geh tŭp dak lêng jêh nĕ khĭt ta aơ. Jêh âk nar săk rveh ƀô ôm jêng nuĭh ƀon lan mư saơ. Nuĭh ƀon lan ta ntŭk sŏk nău nkoch nĕ gay moh săk dak leng lah “Ôm Rveh”. Rnôk nkoch đah bu năch, mpôl hên way rblang răm “Săk rveh ôm” gay năch dơh nkah gĭt lơn. Yan aơ hăn dŭt ueh, trôk nar nđik, dak rsang, bri n’hâm hôm e nâm ơm jêng âk năch dŭt ŭch”.

Nău nkoch nĕ dơi nkoch bah rơh aơ tât rơh êng mô knŭng ƀư an rơh hăn răm m’ak, ma hôm lah trong gay mpôl Bunong mât nău ơm bah ƀon lan. Bah ăp nău khlay văn hóa nĕ, năm 2022, nuĭh ƀon lan ta ƀon Jarah, Yôk Ju n’hanh R’Câp lĕ ndrel ndâk njêng rmôt pâl nđaih Yôk Nâm Nung đah ŭch ndơ̆ nău ueh rnoi mpôl đêt êp lơn đah bu năch. Aƀaơ rmôt geh rlău 40 nuĭh, tâm pă ăp rmôt văn hóa, homestay, ƀư ngăn tâm bri n’hanh ndơ ngêt sa. Du hê dơn ƀư du nău kan, ndrel ƀư jêng ăp ndơ pâl nđaih geh nău luh bah nău rêh bu nuĭh Bunong.

Đah Yôk Nâm Nung, năch pâl nđaih mô knŭng dơi uănh ăp lôk bri krŏng, ăp trong dak leng têh ma hôm ƀư ngăn nău rêh đăp mpăn bah ƀon lan, n’hanh mĭn joi gĭt mpeh nău way ơm cách mạng ta Ntŭk ơm yău kăl e ngih dak Nkual căn cứ B4-Liên tỉnh 4 Nâm Nung. Lơn lah, tâm ăp rơh lễ hội kơt Tăm Blang Mprang ƀon mô lah ƀư brah kuăl mih, năch pâl nđaih dơi lăp tâm ntŭk ntô văn hóa Bunong tă bah nteh chĭng, ăp nău mprơ, nău kan cheh tanh... Ndrel đah nĕ, năch pâl nđaih dơi ngêt sa ăp ndơ sa way ơm kơt trau blân tăng, trau prung bah nkŭr djêl n’hanh biăp nse, djăr gŭch, piăng dĭng, n’ha bum blang, ndrănh yăng.... Yuh H’Thương, Groi Ban Văn hóa-xã hội HĐND xă Nâm Nung, Kruanh Ban mât uănh Rmôt pâl nđaih nsum mpôl Yôk Nâm Nung an gĭt: “Rmôt pâl nđaih nsum mpôl bah mpôl hên mhe nơh wơt dŭt âk mpôl năch bah Italia, TP.Hồ Chí Minh, Hà Nội. Lơn lah tâm rơh lễ, bu năch tât uănh nsong dŭt âk. Âk năch dak bah dih ŭch rêh ndrel nuĭh ƀon lan gay mĭn joi gĭt nău way ơm n’hanh nău rêh gŭ âm bah kônh wa. Mpôl hên ƀư pâl nđaih nsum mpôl tâm rgop đah ƀon Choah, xă Nam Đà tay. Ta nĕ âk ntŭk ueh, hôm mpôl hên geh rmôt văn hóa ƀon lan way hăn mprơ, tŭr chĭng rhŏ an bu năch. Rlău ma wơt năch ta ntŭk, mpôl hên hôm dơi ăp ntŭk pâl nđaih kơt Dray Sap jă tât hăn tŭr an ăp mpôl năch hăn uănh nsong”.

Wa Trần Kim Tuyền, Groi Kruanh jrô kan Văn hóa-Xã hội Nâm Nung an gĭt, ƀon lan dôl nsrôih mât na nao nău geh mpeh ntŭk ntô bri dak, nău way ơm cách mạng n’hanh văn hóa ueh gay hun hao pâl nđaih nsum mpôl. Na nê̆, Đảng ủy, n’gâng kan ƀon lan ta ntŭlk dôl nchrŏng trong hun hao pâl nđaih hăn ndrel đah Nkual Căn cứ B4-Liên tỉnh 4 Nâm Nung, nkre boăt nthoi đah ntŭk pâl nđaih n’hanh ăp nsum mpôl nuĭh ƀon lan kiău ma gay ntop tay ăp ndơ ƀư ngăn dŭt ueh.  “Aƀaơ hin Rmôt pâl nđaih nsum mpôl Nâm Nung geh 42 nuĭh. Xă nchrŏng trong hun hao pâl nđaih nsum mpôl hăn ndrel đah Nkual Căn cứ B4-Liên tỉnh 4 Nâm Nung lah ntŭk ơm yău kăl e gưl ngih dak. Âk băl mom ta ntŭk râng ntop kơl, na nê̆ ntĭm năch trekking tâm bri, uănh bri, dak leng n’hanh ăp nău ƀư ngăn. Rlău ma Rmôt pâl nđaih nsum mpôl Nâm Nung, xă nchrŏng trong hun hao pâl nđaih ta thôn Quảng Hà bah ƀon lan nuĭh Dao n’hanh ƀư ăp rơh tăch ndơ ngêt sa gay boăt nthoi đah nău ƀư pâl nđaih nsum mpôl bah ƀon Jarah”.

Đah nău rêh mhe, nuĭh Bunong ta Yôk Nâm Nung, xă Nâm Nung, n’gor Lâm Đồng hôm e nâp nâl mât nteh chĭng, mât nău mprơ, nău kan way ơm n’hanh nău rêh way ơm ƀon lan. Pâl nđaih nsum mpôl mô knŭng pơk dơi hun hao wăng sa ma hôm jêng ntung nthoi gay ăp nău khlay văn hóa bah nuĭh Bunong dơi mât n’hanh rêng hvi.