Ta Ntŭk kan rhŏ an hành chính nsum xă Tây Sơn, knŭng tâm mô tât 10 mnĭt, nô Nguyễn Minh Phi, ta Khối Tây Xuân, lĕ jêh dăn ƀư rnăk tăch rgâl ta ntŭk mrô. Bah nău ndơ̆ samƀŭt rhăch nău trực tuyến, uănh năl điện tử tât trok mô sŏk prăk măt, ăp ntil dơi cán bộ ntĭm ƀư dâl ta “Ntŭk ntop kơl rgâl mrô”. Nô răm rhơn. “Gâp saơ nău dăn ƀư rnăk wâl tăch rgâl dŭt ngăch. Bah năp lah 3 nar yơn aƀaơ samƀŭt ngăch dơh, ntêm nkrem mông nar. Cán bộ ntop kơl dŭt uĕh, dŭt ngăch”.

Nău rgâl aơ lah săk rnglăy bah nău rĭng tâm ban âk trong mrô ta Ntŭk kan rhŏ an hành chính nsum bah xă Tây Sơn, kơl nuĭh ƀon lan ntĭm ƀư tĭng du tơ̆ ta ntŭk điện tử ndơn yor âk rơh hăn nsong kơt bah năp đaơ.

Bah bôk năm tât aƀaơ, Ntŭk kan rhŏ an hành chính nsum xă Tây Sơn lĕ dơn rlău 3.400 samƀŭt rhăch nău; lĕ rngôch dơi mkra di n’hanh bah năp nar, mkra trực tuyến n’hanh mrô tŏng ăp. Tât dŭt khay 7/2026, xă jêh n’hanh rlău 9/10 rnoh an ndâk njêng xă n’gâng tơm mrô, rnoh nău ŭch bah nuĭh ƀon lan geh 100%.

Nô Trần Lam Sơn, Bí thư Đoàn Druh ndăm xă Tây Sơn an gĭt, aƀaơ xă dôl mbơh ƀư rĭng tâm ban ăp rmôt công nghệ mrô nsum mpôl ta lĕ rngôch 10 thôn. “Rmôt công nghệ mrô mpôl hên pă nuĭh ntop kơl kônh wa nglăp ăp nău dơh mrô. Đah 10 thôn, nău mbơh ƀư hăn kan geh ăp nar, lơn lah nglăp kơt dŏng iGiaLai kơl kônh wa ƀon lan gĭt tât công nghệ”.

Mô rlu ta nkra rgâl samƀŭt hành chính, rgâl mrô ta Tây Sơn dôl rêng lam âk ntil nău bah nău rêh. N’gâng kan ƀon ƀĭt joet đah samƀŭt tâm măy; rhŏ way ơm ntơm rgâl an trok prăk mrô; hợp tác xã n’hanh rnăk tăch rgâl dŏng samƀŭt điện tử; nău kan dak si uănh joi samƀŭt rhăch nău săk soan điện tử; ntĭm nti mbơh ƀư học bạ mrô n’hanh ngih samƀŭt gĭt blău mhe. Ăp trong ƀư aơ dôl jêng rnoh mrô bah gưl xă dâl.

Wa Đỗ Thành Quyết, Groi Kruanh jrô kan Văn hóa-Xã hội xă Tây Sơn, n’gor Gia Lai an gĭt, tâm du năm bah năp, xă lĕ ƀư 34 rơh rƀŭn mô samƀŭt, mbơh ƀư ntrong kan rhŏ mrô đah 155 nuĭh tăch râng trok mô sŏk prăk măt n’hanh geh rnoh lam sóng 5G hao tât 99% rnoh nuĭh ƀon lan. Gay mât n’hanh rĭng săk rnglăy ntrong ƀư xă n’gâng tơm mrô, xă lĕ tĭng 37 nău kan na nê̆ tĭng trong nchrăp yor n’gor Gia Lai n’gluh an. “Xă Tây Sơn uănh khlay ndâk njêng Ntŭk kan rhŏ an hành chính nsum leo lor. Tât aƀaơ, ntŭk kan lĕ jêh ăp nău kan, rnoh n’gluh an. Khay tât, xă nsrôih tâm rgop đah ăp n’gâng kan nău kan, ntŭk kan mât uănh ntĭm rđău ƀư jêh tĭng trong nchrăp bah n’gor”.

Ăp săk rnglăy bôk năp bah xă Tây Sơn lĕ jêng nău ngăn khlay gay n’gor Gia Lai ndâk njêng trong nchrăp pơk hvi ntrong ƀư “xă n’gâng tơm mrô” luh 30 xă tâm khay tât. Wa Lâm Hải Giang, Groi Kruanh UBND n’gor Gia Lai, an gĭt, nău pơk hvi mô êng lah tâm kơt ntrong ƀư bah xă Tây Sơn, ma rƀŏng tât jêng du trong rgâl mrô rĭng tâm ban ta gưl xă, hăn ndrel đah nău ŭch ngăn n’hanh nsĭt tay săk rnglăy na nê̆ an nuĭh ƀon lan. Nău rƀŏng jŏ jong lah ndâk njêng n’gâng kan mrô, wăng sa mrô n’hanh nău rêh jêng mrô tă bah dâng, gay rgâl mrô ngăn ngên jêng ‘hâm soan ntrôl hun hao wăng sa rêh jêng bah n’gor tâm lvang mhe. “Ăp ntrong ƀư mhe mpeh rgâl nkra hành chính n’hanh rgâl mĭn ƀư mhe jêng geh dŭt dơh an nuĭh ƀon lan, doanh nghiệp mbơh ƀư samƀŭt hành chính, rgop n’hŭch mông nar mkra samƀŭt hành chính. Âk ntŭk samƀŭt lĕ jêh, nta an n’gâng kan ƀư ƀĭt joet tĭng tâm sam ƀŭt, gĭt nu nău ngăn gay n’gluh an ăp trong mkra rhŏ uĕh an nău hun hao nsum bah n’gor.

Bah du ntrong ƀư rlong lor, xă Tây Sơn dôl an saơ rgâl mrô mô knŭng lah nău nkoch bah công nghệ, ma lor lah rgâl trong mât uănh n’hanh rhŏ an nuĭh ƀon lan. Rnôk ăp nău dơh mrô geh tĭng samƀŭt hành chính, tĭng tăch rgâl n’hanh tĭng nău rhŏ nsum, ntrong ƀư “xă n’gâng tơm mrô” mbra jêng n’gâng me gay Gia Lai ndâk njêng n’gâng kan mrô, wăng sa mrô tă bah dâng, jêng n’hâm soan mhe an hun hao ngăch n’hanh nâp nâl tâm lvang tât./.