Bah bôk năm tât aƀaơ, bôl Tach ndeh păr Liên Khương an rlu mpăr gay nkra tay, pâl nđaih Lâm Đồng hôm e wơt 12 rkeh bu năch, geh prăk rlău 33 rbăn rmen prăk. Ăp rnoh mrô nĕ an saơ soan wăch rgum bah nkual neh mhe dŭt âk. Ndrĭ yơn, bah kơi ăp rnoh mrô hao jêng lah du nău ôp mô geh nău rblang. Nĕ lah m’hâm ƀư gay mât nău geh bah bri krŏng yôk prêh Đà Lạt, bri krŏng Dak Nông n’hanh dak lêng pŭt Bình Thuận gay kân jâng năch âk nar lơn.

Dơi saơ jêh nglăp nsum, âk công ty pâl nđaih lĕ ngăch ndâk ƀư ăp tour rgop nkual. Ôi ơm uănh măt nar luh ta dak lêng Mũi Né-Kêng măng hăn n’gul nkual ƀon têh yôk Đà Lạt-Nar bah kơi wah kayak ta n’glău tà Đùng. Du trong hăn ntôn kơt dŭt uĕh, yơn rnôk ntơm ƀư ngăn, mô đêt doanh nghiệp lŏ mât “geh ntŭk kol” lĕ bên ngăn: ntung trong. Wa Hoàng Công Định, Giám đốc Công ty TNHH Tăch rgâl n’hanh Pâl nđaih Dima Tour, nkoch:

“Khlay ngăn lah ngăch hun hao geh ntŭk ntô ntung trong lah mô dŭt jêr gay tâm rgop ăp tour đah 3 nkual Mũi Né-Đà Lạt-Dak Nông. Trong hăn hôm e mâp dŭt âk jêr jŏt. Mpŏng geh du trong hăn bah Dak Nông an tât Đà Lạt, Mũi Né dơi hun hao ngăch lơn gay geh âk tour hăn ma dơi hăn nklăp 3 tât 5 nar an năch pâl nđaih ri tâm di lơn.

Mô knŭng doanh nghiệp, năch nơm saơ dŭt kloh ăp ntŭk tăch gâl nĕ. Ăp ntŭk pĭch rlâm, ăp taluy pôk, neh lŭ hôm gŭ lêng lang jêh mih ƀư trong prăk dơi mpŏng kâp lah boăt nthoi ueh đah dak lêng n’hanh bri krŏng yôk prêh jêng nău rvê đah âk nuĭh. Bôk khay 7 mhe rlău, tâm rơh hăn bah Phan Thiết hao Đà Lạt n’hanh rlơ̆ tay tĭng Quốc lộ 28, 55, 28B, yuh Triệu Thị Hồng Phúc âk rơh an hăn mbrơi ta năp ăp ntŭk pĭch rlâm mper trong hăn.

“Geh 4, 5 ntŭk, mih sial hăn pit trong. Saơ klach. Hôm trong đah aơ lah ŭch pĭch rluh lĕ hôm. Neh, lŭ chreh, choih mih rluh dâl. Âk trong nkual yôk nkoe geh âk ntŭk pĭch rlâm nĕ gâp an ƀư mbrơi tay ntŭk yôk an pơng đăp mpăn uănh klach ngăn. Nău nĕ du dơi hăn mih hăn mô dơi mô janh hăn ôh”.

Ta nklang Đà Lạt dâl, ntŭk dơi uănh lah “play nuih” pâl nđaih Lâm Đồng hôm e âk ntŭk nsoih ƀư mô đêt nuĭh n’hoach. Rlău du năm bah năp, trong rse điênj pơk ang ta yôk Prenn-mpông lăp me hăn tâm Đà Latj n’ăp lvang jong mô dŏng tâm măng tâm ngo. Đah n’glău Xuân Hương, du nău nchrăp ƀư têh âk năm jăng dơm jêng rup ndah rlơ̆ đah mpŏng kâp mpeh du nkual têh pâl nđaih mhe.

Nĕ knŭng lah ăp rup gui dơh saơ, nău rvê lơn ta ndơ pâl nđaih. Đà Lạt âk năch. Yơn năch lŏ dŏng prăk mô âk. Wa Nguyễn Văn Lộc, tă ƀư Giám đốc N’gâng kan Văn hóa, Thể thao n’hanh pâl nđaih Lâm Đồng, aƀaơ lah Bí thư Đảng ủy phường Xuân Hương-Đà Lạt, uănh ntĭm sŏng dăng. “Tât Đà Lạt măng tât 9 mông sĭt bĭch, n’glôch dŭt hăn du rwăch ngêt dak tuh lôch jêh. Yor nê rnoh dŏng prăk bah năch pâl nđaih Lâm Đồng he đêt. He rgâl nău mĭn aƀaơ ƀư pâl nđaih mô dơi kơp lĕ bôk nuĭh du khay ndâng âk năch tât đah Lâm Đồng. He way rgum gay mbơh an ueh yơn gâp mĭn an rgâl trong uănh dơn, uănh lah ngăn bah pâl nđaih.

Tât aƀaơ nchrŏng trong hun hao ndơ pâl nđaih rgop nkual jêh nglăp nsum n’gor dŭt âk geh tâm samƀŭt; ăp ndơ pâl nđaih boăt nthoi bri krŏng yôk prêh-bri krŏng-nkual ƀon têh dak lêng lĕ rngôch hôm e ta nău geh; mô hŏ jêng kloh ăp trong hăn, ndơ ntĭt mpơl geh soan tâm rlong âk đah ăp nkual. Wa Hồ Văn Mười, Ủy viên Trung ương Đảng, Groi Bí thư N’gor ủy, Kruanh UBND n’gor Lâm Đồng, sŏng dăng uănh dơn.

Băng: “He mĭn lah ntil nău pâl nđaih ngoăy tâm 3 n’gâng tơm bah jâng wăng sa bah kơi khoảng sản, ŭnh nar n’hanh lŏ mir công nghệ mhe. Yơn gâp saơ mô geh du trong tâm ban ŭch n’hanh mô dơi ƀư rjăp, tâm rgop đah n’gâng kan ƀon lan, N’gâng kan Văn hóa, Thể thao n’hanh Pâl nđaih, ăp ntŭk an geh nău ntrŭt an ntil nău pâl nđaih”.

Nglăp nsum lĕ pơk luh du ntŭk ntô hun hao mhe, yơn nău kan pâl nđaih Lâm Đồng an âk lơn ăp nău mĭn mhe mô lah ăp rnoh mrô hao jêng. Knŭng geh ntung trong boăt nthoi, ndơ dơi ƀư mhe, n’hanh ăp ntŭk ndrel du trong kan, trong hăn uănh nkual neh mhe mbra mô knŭng jong lơn, ma hôm tŏng soan kân jâng năch pâl nđaih.