Nău ngăn bâh ba dâng Tây Nguyên an saơ, ntrong kan, nău kơl kan bol ma lĕ geh âk nău rgâl ueh yơn hôm nha geh âk nău kŏ văk an geh ơm doh rklaih. Ndơn kan an UBND n’gor Lâm Đồng dăn đă Trung ương an geh ƀư lôch tay trong kan pháp luật tĭng ntrong kan tâm ban, dơn ngoăy, rhoăt gleh mông nar doh  rklaih ăp ntil săm ƀŭt kan hành chính, ƀư dơh nơih lơn nău kan rgum sŏk n’hanh mplơ̆ neh geh năm ton. Nkre lah, ta ntŭk ŭch ơm geh doh rklaih ăp nău nchrăp ƀư điện, ndơ dŏng điện, rnoh neh, dŏng neh n’hanh ăp nău nău sŏk dŏng rnoh neh, drăp ndơ nsum gay ma pă rnoh kan, an geh âk nău ntuh kơl.

Ta meng nĕ, rnâng kan way kan Uỷ ban MTTQ Việt Nam n’gor đă ƀư lôch ăp nău ntrŭnh mpeh uănh nđôi, mbơh rblang n’hanh ƀư tĭng nău đă lôch uănh nđôi. Ndơn kan an ăp ntŭk kan n’gâng kan lĕ geh tâm rgop âk nău nsrôih ta 15 nău nchrăp luật n’hanh 4 nău nchrăp kan mpeh nghị quyết, ngăn lah rgum ta Luật neh ntu rgâl mhe, Luật ngih jay gŭ rgâl mhe, Luật tăch rgâl neh ntu mhe rgâl, Bộ luật hình sự rgâl mhe mô lah ăp luật bâh trong kan tahen, mât rnă njrăng ngih dak...

Uănh năl tay lĕ rngôch nău khlăy bâh ăp nău dăn đă aơ, wa Y Thanh Hà Niê Kđăm, Uỷ viên Trung ương Đảng, Bí thư n’gor Uỷ, Kruanh mpôl đại biểu Quốc hội n’gor Lâm Đồng lah na nê̆: “ Ăp nău tâm rgop n’gor đah Mpôl kan lĕ kơl an mpôl kan geh âk rnoh mbrô dŭt na nê̆ ngăn, mpơl na nê̆ nău kan ntrong kan  ngăn ta ntŭk gay ma mpôl kan dơi geh ntoh ngơi tâm rơh rƀŭn nchră tal 1 lah ta nău tâm rgop geh ƀư lôch ăp nău kơl bâh ăp nău ntrŭnh bâh Trung ương. Đah ăp nău tâm rgop, nău dăn đah geh mbơh tơih ta rơh pah kan nar aơ mpôl đại biểu Quốc hội n’gor mbra geh uănh năl, pă kan n’hanh săch ăp nău tơm khlăy, tâm di gay ma tât râng ta rơh tâm nchră ta rmôt, tâm nchră ta ntŭk rƀŭn nchră, lôch nĕ ndơ̆ an ăp ntŭk kan Quốc hội, Chính phủ, Thủ tướng Chính phủ n’hanh ăp n’gâng kan ntŭk kan Trung ương uănh n’hêl doh rklaih tĭng nău dơi kan”.

Nău Quốc hội leo kan ƀư rơh rƀŭn nchră mô way ăp tơ̆ gay ma ngăch doh rklaih ăp nău kan ndal mpơl nău hăn ndrel, mbơh nău kơl kan tâm di yor nău hun hao nsum. Ăp nău tâm rgop na nê̆, geh âk nău dơi kan ngăn bâh Lâm Đồng lah nău veh kơp dŭt ueh ngăn an nău mĭn ƀon lan gĭt, ƀon lan nchră, ƀon lan ƀư, ƀon lan uănh nđôi”. Mbluh aih ăp rnoh kan mpeh neh ntu, ŭnh nar n’hanh ndơ dŏng mô dơn lah trong kan rblang nău an nău mhe bâh Lâm Đồng ma hôm nha geh tâm rgop ngăn ta nău rgâl têh dăng bâh nkual neh Tây Nguyên tâm lvang hun hao mhe.