Ta Hà Nội mhe geh ƀư rơh rƀŭn nchră nău đah dak bah dih tal 33 đah bôk nău “n’hao nău hăn lor bôk năp n’hanh ƀư tĭng trong kan tơm khlăy, ƀa ƀơ bâh rơh nchră nău đah dak bah dih Việt Nam ta rơh mhe”. Ntoh ngơi ta rơh rƀŭn nchră, Tổng Bí thư, Kruanh dak Tô Lâm lah na nê̆ nău ŭch nchră nău đah dak bah dih an ngăn ngên lah n’hao nău kan hăn lor bôk năp tâm nău mât nâp ntŭk đăp mpăn, ueh lăng n’hanh ndăn ngăch rnoh kan bâh dah dih an hun hao neh dak. Tổng Bí thư, Kruanh dak đă n’gâng kan nchră nău đah dak bah dih an geh leo kan, ngăch ngăr geh gĭt đah rơh nkhêp mhe, nchroh lor tâm di ăp ntrong kan gay ma ngăch mbơh tơih an Đảng n’hanh Ngih dak. Nău kan nchră nău đah dak bah dih an geh ƀư na nê̆ đah mât rnă njrăng ngih dak, rnă njrăng đăp mpăn n’hanh nău wăng sa, njêng nău  nâp nâl kơl an nău ŭch mât Neh dak bâh ơm, bâh ngai. Ta meng nĕ, đồng chí hôm nha đă an geh n’hao tay săk rnglăy rnă  njrăng đah dak bah dih âk ding, leo kan tâm rgop âk ta ăp ntrong kan ta nkual n’hanh lam ntur neh. Nău kan n’hao dơi pah kan mpôl cán bộ nchră nău đah dak bah dih nkre kan ueh kan di lah ntrong kan tơm khlăy gay ma tâm di đah nău ŭch n’hao nău dơi, nău knơm bâh Việt Nam ta ntŭk kan lam ntur neh ta rơh mhe.