Tâm 7 khay ba năp, n’gor Khánh Hoà vơt rlău 15 rkeh năch pâl nđaih, hao bơi tât 39% đah khay aơ năm 2025, tâm nĕ năch dak bah dih geh klâp ma 5,5 rkeh tơ̆ n’hanh lĕ rnoh geh klâp ma rlău 82 rbăn rmen prăk. Êng tâm khay 7, Festival dak lêng Khánh Hoà 2026 đah bôk nău “ueh nđir dak lêng- hun hao đah lam ntur neh” lĕ jêng nău nsrôih têh rnôk ma geh bơi tât 790 rbăn năch tâm 3 nar geh ƀư lễ hội, nsĭt geh tât rlău 1.300 rmen prăk. Ndơn kan an ntŭk kan văn hoá, thể thao n’hanh pal nđaih n’gor an gĭt tâm let năp tay ta ntŭk mbra geh pơk trong mpăr sŏng bâh Đồng Hới tât Cam Ranh, ntrôl an geh âk bu năch Trung Quốc tât, ntĭm nti rnoh nuĭh ngơi nău Nga, ƀư lôch nău kơl pâl nđaih ntŭk ƀon lan gŭ n’hanh ƀư lôch săm ƀŭt mbơh đă kơp dơn pâl nđaih ngih dak mpeh ba lơ ndru gôl dak Cam Ranh gay ma mpŏng tât hun hao nâp nâl.

Bah bôk năm tât aƀaơ, n’gor Dak Lak wơt nklăp 5,3 rkeh năch, hao 37% nkôp đah rơh aơ năm e n’hanh geh dĭng lĕ rlău 9.600 rmen prăk. Gay jêng nău rƀŏng wơt 10 rkeh năch tâm năm aơ, Ban ntĭm rđău Hun hao pâl nđaih n’gor tâm ban ŭch rgum jêh Bôk nău rgop an tâm nchră Hun hao pâl nđaih lvang 2026-2030, ndâk njêng năl moh săk, hun hao ndơ OCOP hăn ndrel đah pâl nđaih n’hanh ntrôl dăng rgâl mrô. Kruanh UBND n’gor đă ăp nău kan dơi kan tâm rgop tăch rgâl đah pâl nđaih, hun hao pâl nđaih lŏ mir, nsum mpôl n’hanh dôh rklaih wăk kol an ăp nău nchrăp ƀư. Lơn lah nău kan văn hóa an tâm rgop tâm nchră jêng ntŭk tât, pơk ndơ pâl nđaih mhe ta ăp ntŭk kơt Ea Kao, Tuy Hòa, Lắk gay geh nău êng n’hanh wăch năch pâl nđaih tâm năm 2027.