Quốc hội mbra uănh mĭn tay, mbơh an 15 nău nchrăp ƀư luật, 4 nău nchrăp ƀư nghị quyết quy phạm pháp luật; an rgop nău đah 7 nău nchrăp ƀư luật, uănh mĭnh tay, ntrŭnh trong kan nuĭh kan mpeh dơi mkra nău n’hanh ntrŭnh 6 nkô̆ nău khlay mpeh wăng sa-rêh jêng, ntuh kơl. Aơ lah rnoh nău kan têh, tâm nĕ geh âk nkô̆ nău geh na nê̆ tât nuĭh ƀon lan, doanh nghiệp, nău kan bah n’gâng kan ngih dak n’hanh hun hao wăng sa-rêh jêng.

Ta rơh rƀŭn, Quốc hội jêh trong ƀư dôh rklaih ntŭk kol, rklaih nuĭh kan n’hanh hao jêng. Âk nău nchrăp ƀư dơi uănh mĭn tay geh tât ntŭk ntô ntuh kơl, tăch rgâl n’hanh n’hâm soan tâm rlong bah jâng wăng sa; tâm di đah nău đă rgâl mhe n’gâng kan, pơk dŏng n’gâng kan ƀon lan 2 gưl, ntrôl dăng pă gưl, pă nău dơi n’hanh n’hao tam, săk rnglăy mât uănh ngih dak; jêh trong ntrôl khoa học, công nghệ, rgâl mĭn ƀư mhe n’hanh rgâl mrô.