Tâm rnôk tĭng ƀư ntơm bah 2026 - 2027. Tâm lĕ rngôch rlău 215 rmen prăk kơi ntop tay, geh nklăp 184 rmen prăk Trung ương, rlău 31 rmen prăk ngân sách n’gor Dak Lak. 

UBND n’gor Dak Lak kơi ntop an Nhih nti nội trú rep gưl xã Ia Lốp 68 rmen prăk; Nhih nti nội trú rep gưl xã Ia R’vê dơi ntop tay 59 rmen prăk; Nhih nti nội trú rep gưl xã Buôn Đôn dơi ntop tay 89 rmen prăk. Tơm prăk dja dŏng gay ntuh kơl ăp ƀư tay ăp jay mât bôk kan, thư viện, jay gŭ nsum an nai ntĭm n’hanh ăp ndơ rhŏ dŏng an ntĭm n’hanh nti bah ăp nhih nti. Lvang năm 2025 – 2027, n’gor Dak Lak an ƀư rdâk njêng 3 Nhih nti nội trú rep gưl ta nkual n’har bri, lah Ia Lốp, Ia R’vê n’hanh Buôn Đôn, đah lĕ rngôch rnoh ntuh kơl rơh bôk năp rlău 390 rmen prăk. Ăp nhih nti ƀư lôch jêh n’hanh n’glăp dŏng tâm năm nti 2026 – 2027. Năm nti mhe 2026 – 2027, ăp nhih nti phổ thông dân tộc nội trú rep gưl ta nkual n’har bri n’gor Dak Lak mbra wơt nklăp 3.100 kon se nti bah jrô 1 tât jrô 9.