Kêng măng 4/8, Rnâng kan HĐND n'gor Dak Lak an rgop mpeh ăp trong ƀư, nău ntop kơl ăp ngih samƀŭt nội trú nội nkual n'har bri dŏng săk rnglăy, đăp mpăn, jŏ jong. Aƀaơ ăp ngih samƀŭt nội trú 2 gưl ta ăp xă n’har bri bah n’gor ntơm đăp mpăn ngăch ndâk ƀư, nchrăp ndơ̆ an dŏng tâm năm nti 2026-2027. Yơn lah, du đêt ndơ ƀư, ndoh ndơ dŏng, nău tâm pă nai, nuĭh kan rhŏ an nội trú, ndrel trong ƀư săch kon hŏk nti, nău ntop kơl ân ƀư jêh. Wa Cao Thị Hòa An, Kruanh HĐND n’gor lah rjăp, ntuh kơl ngih samƀŭt nội trú nkual n’har bri mô knŭng ndâk ƀư ndoh ndơ ma an tŏng ăp kon hŏk nkual jêr jŏt dơi tât ngih samƀŭt, mât uĕh săk rnglăy ndơ ƀư; Dăn đă UBND n’gor ntĭm rđău ăp ntŭk kan geh tât ntrôl ngăch ndâk ƀư ăp ngih samƀŭt nội trú nkual n’har bri, ơm jêh dự thảo Nghị quyết mpeh nău kơl an kon hŏk n’hanh ăp ngih samƀŭt nội trú.

Lơ 4/8, UBND n’gor Gia Lai ntrŭnh mbơh ntrong kan pă dăp, leo ƀư tay nău kan ngih nti mầm non n’hanh phổ thông công lập gay ma n’hao an săk rnglăy mât uănh, dong mpôl nai nti, ntŭk kan ndơ dŏng, an tâm di đah nău ŭch hun hao ntĭm nti ta trong kan mhe. Tĭng ntrong kan, rnoh ngih nti mầm non n’hanh phổ thông công lập bâh n’gor mbra geh n’huch bâh 1.267 ngih nti jur hôm 699 ngih nti (hŭch 568 ngih nti). nău pă dăp geh ƀư tĭng ntrong kan, tâm di đah nău ngăn ta ntŭk, tâm nĕ, ta 61 xã, phường nkual dơh nơih rnoh n’huch ngih nti geh rlău 51%, hôm 74 xã phường hôm e geh rlău 37%. N’gâng kan ntĭm nti Gia Lai an gĭt, ntrong kan pă dăp mbra geh ndrel đah mât đăp mpăn nău nti bâh kon hoc, ngăn lah kon hoc nkual jêr jŏt, nkual ƀon lan rnoi đê̆.