Hăn đah duk wah ty ta măt dak Bàu Đá, dơi uănh pih gơ̆ tâm dak ta nâm n’hong dak nđik. Ăp gôl pih, yôk tơm si, lŭ nkô, n’hanh ăp tơm sen ƀô kah n’ăp khay mih, lơ ƀư ntŭk ntô Bàu Đá ntop ueh lơn. Lĕ rlău 700 năm wa Đào Kim Thông ta thôn Mỹ Điền, xă Hòa Thịnh lĕ tĭng đah nkual bri dak băm aơ bah jêt n’hanh rlet rlău ăp năm khay tâm lơh tâm su hô ngăn. Yor nkual bri dak băm Bàu Đá aơ lĕ nking n’gang an nuĭh ƀon lan n’hanh mât rêh Cách mạng gay ƀư jêh nău rdâk lơh Hòa Thịnh năm 1960. “Cách mạng n’hanh nuĭh ƀon lan ta aơ rnôk nchoăt du rlăng... hăn duk mpôn choanh ta nâp tơm si têh nĕ, lăp ta aơ ndê. Saơ ndeh păr lah lăp tâm trôm pih mpôn. Ndrel rdâk lơh jêh nĕ tât năm 63, 64 dun n’gang tay rlăng, he nchoăt lăp tâm djut aơ, lăp yôk mpôn ta nâm trôm nĕ”.

Khay 7 n’hanh Khay 8, nkao sen, nkao súng ta Bàu Đá Hòa Thịnh hôm e dŭt uĕh. Rup nkao hồng, uĕng nglang, ueh chăng ăp nkao măt dak ndrel tâm rlong ueh đah nkao nung, nkao tơm khoăr bah ta ka lơ yôk prêh... lơ ueh an rup hui bri dak băm Bàu Đá ntop ntơr ang, wăch rgum. Đah nuĭh ƀon lan ta ntŭk, Báu Đá nkre lah ntŭk uănh dŭt uĕh, nkre lah nkual neh têh khlay kăl e, lah ntŭk geh âk drăp ndơ yău:  “Gâp saơ nău ueh ta Bàu Đá aơ lah geh dôk aơ, jêh nĕ ka, sĭm, jêh nĕ tơm bần, jêh nĕ sen, súng... Ăp ntil tơm si. Tâm aơ pâl nđaih lah dŭt ueh. Bah khay 12 an tât khay 9, khay 10 dương lịch lah ueh ngăn”.

Lôch âk năm bah năp, nuĭh ƀon lan thôn Mỹ Điền, lah êng n’hanh ăp thôn, ăp xă kiău ma rêh nsing tâm nău geh tui ka bah nkual bri dak băm aơ. Mô knŭng nĕ, đah nău uĕh ơm, ndrel si gơ̆ ueh, âk ntil, nkual bri dak băm Bàu Đá Hòa Thịnh dôl dâk ta năp dơi hun hao pâl nđaih sinh thái. Wa Phương Văn Lành, Bí thư Đảng ủy xă Hòa Thịnh an gĭt, xă dôl nchrŏng hun hao bri dak băm Bàu Đá jêng ntŭk pâl nđaih nsum mpôl hăn ndrel đah mât ndrăy bri dak.“Xă lĕ ƀư rlong hăn tour ƀư ngăn pâl nđaih Bàu Đá. Êp tât ri mbra ndâk njêng nău rgop an tâm nchră hun hao pâl nđaih nsum mpôl tĭng trong ndâk njêng hợp tác xã pâl nđaih nsum mpôl, n’hanh ăp nuĭh ƀon lan ta xă Mỹ Điền aơ mbra ăp nuĭh na nê̆ tât râng pâl nđaih. Khân pơng mbra wah duk ndơ̆ năch pâl nđaih hăn uănh bri dak băm Bàu Đá, n’hanh lah ăp nuĭh ntĭm nkoch ntŭk ueh, nău geh ndrel nău ueh bah djut dak băm Bàu Đá aơ”.

Hòa Thịnh-ntŭk lah nkual “klŭng” jêr jŏt aơ dôl dâk bah năp mpông lăp rgâl săk geh âk nău ton tâm mâp. Nău rdâk nău geh pâl nđaih ta djut Bàu Đá mô knŭng pơk luh joi nău rêh mhe, n’hao nău rêh an kônh wa, ma hôm mpông pơk khlay mât ndrăy tŏng ăp nău uĕh ơm bah bri dak.