Ta rơh pah kan, Tổng Bí thư, Kruanh dak Tô Lâm lah na nê̆, rdâk njêng ndơ dŏng ntung trong lah du nău kan tơm khlăy, geh nău kan khlăy jŏ jong n’hanh sŏng dăng mpŏng tât ntŭk gay ma hun hao, n’hao nău dơi tâm rlong n’hanh njêng nău kan tơm khlăy ngăn gay ma ndơ̆ Việt Nam jêng dak hun hao ta năm 2045. Tổng Bí thư, Kruanh dak rnê ăp nău dơi geh khlăy ma Chính phủ, ăp n’gâng kan, ăp ntŭk kan lĕ dơi geh tâm ntrong hun hao ndơ dŏng ntung trong ăp năm ba năp, ntop doh rklaih âk nău kŏ văk n’hanh pơk hvi ntŭk hun hao. Yơn lah, ta meng ăp nău dơi geh, ndơ dŏng aƀaơ hôm nha ê hŏ geh tâm di đah nău ŭch hun hao 2 rnoh mbrô n’hanh nău ŭch jêng dak geh nău geh âk. Tổng Bí thư, Kruanh dak Tô Lâm mbơh nkah âk ntrong kan tơm khlăy n’hanh lah na nê̆, tâm ntrong kan hun hao mhe, ndơ dŏng ntung trong an geh dơn du nău kan têh khlăy lơn ngăn, njêng du nău dơi pah kan jan sa ueh mhe, n’hao nău dơi pah kan n’hanh ƀư tơm công nghệ, n’hao nău dơi njrăng rdâng n’hanh pơk luh du ntŭk hun hao mhe an neh dak.