Kêng măng nđaơ (22/09) ta Nhih pah kan Chính phủ, Thủ tướng Chính phủ Lê Minh Hưng ƀư tơm rơh rƀŭn nchră  đah  n’gâng kan rdâk ƀư ngih jay ntung trong n'hanh ăp n'gâng kan geh tât gay ôp uănh, ntrŭt ntrôl nô nău an ƀư n'hanh n'gluh tơm prăk đah ăp ndơ ƀư, nău nchrăp ƀư khlay gưl neh dak mpeh nău kan ntung trong. Ntoh ngơi ta rơh pah kan, Thủ tướng Lê Minh Hưng lah rjăp, lĕ rngôch tơm prăk ntuh kơl nchrăp an ăp nău nchrăp ƀư ntung trong khlay tâm năm 2026 lah dŭt âk, geh rlău 250.000 rmen prăk. Aơ lah tơm ndơ khlay ân dơi an ƀư đăp mpăn uĕh nâp n'hanh rnoh ngăch gay ntrŭt ntrôl hun hao wăng sa - rêh jêng kon nuĭh, rgop uĕh tâm nău rƀŏng hao jêng geh bar rnoh mbrô, ntuh kơl uĕh nâp n'hanh njêng jâng nsing nâp nâl gay ma an hun hao nău wăng sa rêh jêng kon nuĭh lĕ năm kan. Tâm rnôk nar hôm ƀa ƀă bah năm 2026 knŭng hôm pe khay dơm, Thủ tướng đă N’gâng kan rdâk njêng ngih jay, ntung trong n’hanh n’gâng kan tơm prăk ndrel đah ăp n'gor ân nsrôih dŭt n'hâm, rgum lĕ săk soan suan drăp ndơ gay tât rnoh n'gluh tơm prăk 100% trong nchrăp prăk hŏ jao.