Ôi 21/9, tĭng mông ta ntŭk, ta nkual ƀon têh New York, Tổng Bí thư, Kruanh dak Tô Lâm ndrel Mpôl ntơh măt gưl têh Việt Nam mâp Mpôl rnâng kan n’hanh Sinh viên Việt Nam ta Hoa Kỳ ndrel ăp nuĭh rnâng kan, nuĭh gĭt blău Việt Nam dôl pah kan ta Hoa Kỳ. Nklăp 40 nuĭh ntơh măt tâm ăp trong kan trí tuệ nhân tạo, rgum mât prăp nău lư, ndeh păr mô geh nuĭh ƀĭt, ƀư njêng phần mềm, trong kơl ngih dak, prăk kaih, ntĭm nti n’hanh luật dak bah dih râng mâp măt.

Ăp nuĭh rnâng kan dăn đă âk trong nkra gay n’hao nău têh khlay bah Việt Nam tâm rêng rnoh khlay trí tuệ nhân tạo lam ntŭr neh, wăch rgum tơm prăk dak bah dih, nkre buăt nthoi tơm ndơ gĭt blău nuĭh Việt ta dak bah dih đah tâm dak. Lah ta aơ, Tổng Bí thư, Kruanh dak Tô Lâm rnê âk ăp nău rgop lĕ nuih n’hâm, ngăn ngăn; lah rjăp nău ŭch geh nta trong dơh gay ăp nuĭh khoa học gŭ mĭn, blău njêng mhe n’hanh rgop an neh dak. Tổng Bí thư, Kruanh dak an lah nuĭh Việt Nam gŭ ta dak bah dih lah du gâl mô dơi tăch luh bah rnoi nuĭh Việt Nam n’hanh lah tơm ndơ khlay têh jong. Ăp nhih pah kan tâm dak ân lor nchrăp djăt, jă nuĭh rnâng kan râng bah ơm tâm rdâk njêng trong kơl, nău dơn kan gŭ mĭn n’hanh bôk nău kan ntĭm nti, bah nê ntik n’hao nău tam lơn tơm ndơ gĭt blău nuĭh Việt Nam gŭ ta dak bah dih.