Wa Y Tong Bkrông, 47 năm deh, rnoi Êđê, ta xă Ea Na, tât Ngih dak si Krông Ana gay but uănh, uănh nđôi săk soan. Ta Kiosk thông minh, wa dơi ntĭm nchih nău lư mbơh dăn but uănh, uănh nđôi n'hanh sŏk rnoh mbrô knŭng tâm đêt mnĭt. Bah rnôk dăn ƀư samƀŭt tât rnôk dơi but uănh mô hŏ tât 20 mnĭt. Wa Y Tong an gĭt: "Hăn but uănh ta aơ aƀaơ gâp saơ dŭt dơh. Bah năp đaơ, hăn but uănh an nchrăp âk ndơ, yơn aƀaơ knŭng căn cước công dân, quét mã jêh nĕ nchih nău lư dơm. Dŭt dơh. Aơ lah nău dơi bah rgâl mrô tâm nău kan dak si n'hanh ăp ntil nău rêh bah nuĭh ƀon lan lam dak".

Mô knŭng mbơh ƀư ntŭk Kiosk thông minh, Ngih dak si Krông Ana lĕ ndơ̆ săm ƀŭt điện tử lăp dŏng bah khay 9/2025, tĭng kơn rgâl săm ƀŭt sam ƀŭt. Ntŭk mât uănh lĕ rngôch nău lư bah hành chính, nău lư săm ji, nchroh, uănh năl, rup gui tât sam ƀŭt dak si n'hanh trong săm. Nŭih ji mbra dơi dăn ƀư but uănh đah CCCD, VNeID mô lah VssID, kơl rhoăt đêt sam ƀŭt, n'hŭch mông nar kâp n'hanh n'hao săk rnglăy mât uănh. Nai dak si Hồ Văn Lập, Groi Giám đốc mât uănh Ngih dak si Krông Ana an gĭt, ntŭk kan dôl rgâl mrô tĭng trong bah N'gâng kan dak si n'hanh nchrăp ƀư lôch jêh tâm khay 11/2026. "Tâm nău jêr jŏt, ntŭk kan lĕ dŏng nău rêh jêng n'hanh dơi ntop kơl du n'gâng Kiosk thông minh, bah nĕ mbra dơi dŏng săm ji điện tử gay rgâl mrô. Tĭng trong rƀŏng tât khay 11/2026 bah N'gâng kan dak si, Ntŭk kan mbra nchrăp nchrăp n'gluh lĕ rngôch săm ji ma samƀŭt way ơm bah năp đaơ".

Kơt ta rmôt kan dak si ngih dak đŏng, trơn rgâl mrô dôl geh ntrŭt dăng tâm rmôt kan dak si êng n'gor Dak Lak. Kơt Ngih dak si Đại học Y dược Buôn Ma Thuột, lĕ ntrŭnh 100% trong Kiosk đăng ký khám, trong máy tính ân n'gâng kan dak si, nthoi ngăn đah ăp khoa, jrô kan, kơl mât prăp, njoăl ndrel pă rup gui uănh năl. Bah meng nê, trong nội soi geh rgum AI ndrel jrô xét nghiệm geh ƀư êng, rgop nău n'hao nău nâp ndrel săk tam but uănh săm ji.

Nai dak si Võ Minh Thành, Giám đốc Ngih dak si an gĭt, đah nău rgâl mrô jru hvi, mô knŭng nău wơt dơn n'hanh săm ƀŭt ƀĭt joet, ma nuĭh ji dơh uănh năl nu nău săk soan bah he đŏng. "N'glôch jêh rơh but uănh, săm ji, nuĭh ji dơi pă du mã QR geh n'glăp trong link, n'hanh rnôk pơk, lăp tâm mbra luh dơi trang n'glăp lĕ rngôch nău lư jêh uănh năl, uănh năl rup gui bah CT, MRI n'hanh dơi njuăl tât máy tính mô lah điện thoại bah he. Dŭt dơh yor nuĭh ji mô kâp djôt ndơ kơt bah năp".

Tĭng rnoh kơp bah N'gâng kan dak si n'gor Dak Lak, 100% ntŭk but uănh, săm ji ta n'gor lĕ dŏng Căn cước công dân, Căn cước công dân điện tử (VneID) n'hanh BHXH điện tử (VssID) gay uănh năl nău lư but uănh, săm ji, rgâl thẻ bảo hiểm y tế samƀŭt; nkre mbơh ƀư trok prăk săm ji mô dŏng prăk măt. Rlău 771.000 nuĭh ƀon lan lĕ geh ndrôm samƀŭt săk soan điện tử. Ăp ntŭk lĕ mbơh ƀư săm ji điện tử, tâm nĕ 8 ntŭk rgâl lĕ rngôch săm ji samƀŭt. Wa Phạm Minh Hữu, Groi Giám đốc N'gâng kan dak si n'gor Dak Lak, an gĭt tĭng trong nchrăp bah N'gâng kan dak si, tât lĕ khay 11/2026, lĕ rngôch ntŭk kan dak si ta Dak Lak an mbơh ƀư dăn ƀư but uănh ma Kiosk, dŏng săm ƀŭt điện tử rgâl săm ƀŭt sam tra n'hanh rgum lăp nău lư ƀon lan dak si. "Mpôl hên dôl ƀư ôp uănh tay lĕ rngôch ăp ngih dak si mpeh công nghệ thông tin, trong ƀoh gay gĭt nău lư săk soan điện tử bah nuĭh ƀon lan. Aƀaơ 12 rnoh nău lư ƀon lan gŭ geh tât dak si dôl dŭt n'hâm an ƀư tâm rơh 90 nar tĭng nău rđău đă bah N'gâng kan dak si n'hanh mbra jêh tâm let năp tay. Bah nĕ, geh tŏng ăp tơm nău lư ƀon lan gŭ dak si bah n'gor Dak Lak".

Rgâl mrô tĭng Nghị quyết 57 bah Bộ Chính trị dôl tĭng kơn rgâl trong ƀư nău kan bah N'gâng kan dak si Dak Lak, bah dăn ƀư samƀŭt but uănh, mât samƀŭt  rhăch nău, nchroh n'hanh trok prăk săm ji. Nău tâm pă nău lư n'hanh ntrôl dăng kơt dŏng công nghệ mô dơn n'hao săk rnglăy mât uănh, ma khlay lơn lah rhoăt đêt mông nar, n'hŭch sam ƀŭt sam tra n'hanh nta nơih an nuĭh ji. Aơ hôm lah jâng nsing gay N'gâng kan dak si Dak Lak rdâk tay trong kan dak si uĕh mhe, sŏk nuĭh ƀon lan ƀư rgum tơm rhŏ dŏng.