Tâm rnôk kuĭh neh ƀư ueh gay tăm keo ta nkual yôk Suối Dứa, thôn Đồng Lãnh, xã Phú Hòa 2, n'gor Dak Lak, wa Trần Văn Lợi, ta thôn An Mỹ Nam, saơ du dŭng tâm neh. Tâm trôm geh âk ndơ dŏng năl lah ndơ bah tahen jêng wa mbơh nhih pah kan tahen ta ntŭk. Lơ 21/9, Ban Chỉ huy Quân sự xã Phú Hòa 2 kan nsum đah Đội K51, Phòng Chính trị, Bộ Chỉ huy Quân sự n'gor Dak Lak ƀư joi n'hanh rgum du  nting tahen khĭt. Ndrel đah nting tahen, mpôl kan dơi kan saơ 13 play ao, kho ao tahen, mâng tho sêk, ntô ndrak, rse kât tăng, n’gâr sung, rse ba lô... Yor gâl nting lĕ jêng neh (lêk nkre tâm neh), mô tŏng nău dơi sŏk uănh năl ADN. Nting dôl dơi mât prăp ta Jay nkah gĭt tahen khĭt tâm thôn Phụng Trường 1, kâp mpôl kan joi, sĭt tâp. Aơ lah nting tahen khĭt tal 35 dơi geh Mpôl K51 rgum sĭt bah rnôk mbơh ƀư "Nău kan 500 nar măng".