N’glôn jêh rơh rƀŭn, Tổng Bí thư, Kruanh dak uănh lah prêh nuih n’hâm lĕ đah nău kan bah ngih pah kan tâm rnôk nchrăp ăp dự thảo, mbơh, nău rgop an tâm nchră; nkre đă djăt tay nău rgop, lôch jêh samƀŭt rhăch nău đăp mpăn uĕh nâp n’hanh ngăch.

Đah bôk nău ƀư rgop an ƀư ăp nău ntrŭnh hun hao wăng sa ngih dak tĭng Nghị quyết 79 bah Bộ Chính trị, Tổng Bí thư, Kruanh dak đă tâm ban ŭch wât mpeh wăng sa ngih dak kơt du rkum geh prăk kaih, drăp ndơ nsum, neh ntu, bri dak, ntung trong, ntêm nkrem ngih dak, doanh nghiệp ngih dak n’hanh ăp prăk kaih nsum êng. Uănh khlay khay tât lah kơp uănh lĕ rngôch trong pháp luật geh tât, dôh rklaih ăp ntŭk kol mpeh prăk, n’hao săk englăy mât uănh doanh nghiệp ngih dak n’hanh mât uĕh ƀư tơm leo bah wăng sa ngih dak tâm jâng wăng sa.