Kêng măng 7/3 ta Hà Nội, Tổng Bí thư Tô Lâm ƀư tơm rơh pah kan đah Ban Chính sách n’hanh Chiến lược Trung ương mpeh du đêt trong nkra têh jong gay njêng đăt ndal hun hao wăng sa bah dih ngih dak Việt Nam tâm let năp tay. Lôch tâm nchră, âk nău rgop an lah tâm bah ri aơ nơh wăng sa bah dih ngih dak Việt Nam hŏ geh ăp njuat hun hao khlay, yơn dôl mâp âk mpêr n’gar nking kol, khuch tât nău ntik n’hao nău khlay têh khlay  n’hanh nău dơi rgop bah jâng wăng sa bah dih ngih dak đah nău hun hao bah jâng wăng sa dak he.

Yor kơt nê̆ aơ lah rnôk mô dơi an mbrơi nkai lơn gay ntlơi jăng ăp mpêr n’gar nking kol, rdâk tay suan dăng bah jâng wăng sa tơm dja, rgop n’glêh an tâm nău tĭng ƀư dơi trong nchrăp têh jong hun hao neh dak tât năm 2030 n’hanh 2045 n’hanh lam Đảng, lam ƀon lan he hŏ n’gluh n’hanh nsrôih tĭng ƀư. Lah ta rơh pah kan, Tổng Bí thư Tô Lâm du tơ̆ tay đŏng lah rjăp, wăng sa bah dih ngih dak lah suan ntrôl khlay bah jâng wăng sa ntŭk tăch rgâl rƀŏng tât xã hội chủ nghĩa lơn lah an hun hao. Tâm let năp tay Đảng, Ngih dak mbra geh ăp nău n’glêh an trong kơl têh, khlay gay njêng suan ntrôl an hun hao jâng wăng sa bah dih ngih dak hun hao dăng lơn, gay mpôl doanh nghiệp hun hao têh uĕh rgop di tâm rnôk hun hao wăng sa rêh jêng kon nuĭh bah neh dak.