Ôi 18/3 ta Nhih pah kan Trung ương Đảng, Rnâng kan Ban Rđău đă Trung ương mpeh njrăng, n’gang rdâng lơh sa khâm, mpŭng lir, tih djơh ƀư rơh hop ta nâm nău ƀư tơm bah Tổng Bí thư Tô Lâm, Kruanh Ban Rđău đă gay tâm nchră, an nău rgop mpeh lôch jêh tĭng ƀư pah kan ntơm bah bôk năm tât aƀaơ n’hanh nău dơn kan tâm 6 khay bôk năm 2026.

Lah rjăp, tơm prăk gay ntuh kơl hun hao let năp tay lah dŭt têh, ân ndơ̆ luh lah dŏng tơm prăk luh saơ ntil, mô an geh sa khâm, mpŭng lir tih djơh, Tổng Bí thư Tô Lâm dăn đă ăp gưl ủy, mpôl kan đảng, nhih pah kan dơi kan rgum rđău đă tay, nchŏng đă an tĭng ƀư geh nău tam ăp nău dơn kan, đah nău mĭn lah sŏng dăng, rôih rnêng, ngơi đêt ƀư âk, njêng nău rgâl ngăn ngăn gay ƀon lan saơ, ƀon lan ndrel hăn, ƀon lan n’grŏ tĭng.

Njrăng đă mpeh ăp nău dơn kan lor let năp tay, Tổng Bí thư Tô Lâm dăn đă rgum jêng trong tĭng ngăn ăp trong nchrăp, nău mĭn bah Đảng mpeh nkra ăp nău tih, nô nău sa khâm, mpŭng lir, tih djơh; n’hao dăng mât kân nău dơi kan nkre đah wat jêh n’gâng kan bar gưl; ntrôl ngăch ôp uănh, nkra dŭt bah ăp nău tih, nô nău dơi uănh khlay. Tổng Bí thư Tô Lâm dăn đă ntrôl dăng pah kan njrăng n’gang sa khâm, mpŭng lir, tih djơh nkre đah nău ŭch tât geh hun hao.