Ôi ntri (12/3), Thủ tướng Singapore Lawrence Wong hŏ ƀư tơm nar wơt n’hanh tâm nchră đah Tổng Bí thư Tô Lâm. Lôch rnôk ƀư wơt ngăn, Tổng Bí thư Tô Lâm geh rơh mâp ngăch Thủ tướng Lawrence Wong, lôch nê 2 kruanh rđău kan mbra ƀư rơh tâm nchră gưl têh ndrel tâm nchră n’hanh n’gluh ăp trong gay ƀư jru hvi lơn tâm boh đah bar Đảng, njêng ntŭk nsing chính trị nâp an tâm boh bar dak tâm let năp tay.

Ta tâm nchră, bar ding ndrel tâm ban ŭch  ăp trong rƀŏng têh, ndơ̆ tâm boh têh jong lam lĕ rngôch Việt Nam- Singapore hun hao ngăn ngăn, geh nău tam, rgum tâm nău n’hao dăng nsing nơm chính trị ma trong tâm khâl ăp gưl, lơn lah gưl têh; pơk hvi n’hanh ƀư jru hvi lơn đŏng tâm boh tâm trong wăng sa, tăch rgâl, ntuh kơl; ntrŭt ntrôl tâm boh mpeh rgâl mbrô, rgâl blău ƀư mhe, wăng sa kloh uĕh, ŭnh nar sĭt jêng tay; n’hao dăng tâm boh tâm ăp trong kan njrăng n’gang neh dak – rnă njrăng, văn hóa, ntĭm nti, pâl nđaih n’hanh tâm nđŭr ƀon lan. Mpeh  ăp nkô̆ nău tâm nkual, bar ding tâm ban ŭch n’hao dăng tâm rnglăp ASEAN, uănh khlay tât hun hao jŏ jong bah ăp tiểu vùng tâm nkual, tâm  nê geh Tiểu vùng Mê Công, bah nê rgop uĕh an ASEAN nsrôih ndôr êng, têh ndrŏng n’hanh hun hao jŏ jong, ntik n’hao nău khlay kan ƀư rgum tơm tâm nkual.